Մեզ մոտ դեռ ամեն ինչ խաղաղ է, որևէ նախընտրական տրամադրություն, թիմերի բաժանվել չկա։ Այս մասին այսօր «Հրապարակ»-ի հետ զրույցում ասաց Վարդենիս խոշորացված համայնքի Վերին Շորժա բնակավայրի վարչական ղեկավար Արտյոմ Երանոսյանը։

Երանոսյանի խոսքով մինչ այս պահը քաղաքական ուժերից որևէ մեկը գյուղ չի եկել ու որևէ հանդիպում չի ունեցել։ «Վարդենիս եկել են, վերջերս Նիկոլ Փաշինյանն էլ է ինչ որ եկել, բայց մեր գյուղ չեն եկել։ Ես ոչ էլ էս պահին մտածում եմ ընտրությունների մասին, դեռ չգիտեմ էլ ում եմ ընտրելու»։

Հարցին՝ Վարդենիսի համայնքապետ Ահարոն Խաչատրյանը, որ որպես ընդդիմադիր համայնքապետ էր ընտրվել, վերջերս ՔՊ-ական է դարձել, դուք՝ որպես վարչական ղեկավար, նույնպես ՔՊ-ին եք սատարո՞ւմ՝ Երանոսյանը պատասխանեց․ «Չէ, չէ, ես անկուսակցական եմ, որևէ կուսակցության չեմ հարում»։

Անդրադառնալով մեր այն տեղեկությանը, որ վերջին շրջանում որոշ վարչական ղեկավարների հորդորել է, որ ՔՊ-ի օգտին աշխատեն և իրենց համայնքներում ձայներ հավաքել, հակառակ դեպքում ընտրություններից հետո իրենք չեն աշխատի այլևս, Երանոսյանը պատասխանեց, որ վերջին 1 ամիսը Ռուսաստանում է եղել, քանի որ անասունների նոր սորտեր պիտի ներկրի Հայաստան․ «Պետության սուբսիդավորմամբ 200 անասուն ենք ներկրում մի քանի գյուղացիներով։ Հիմա ինչ որ հիվանդություններ կան տարածված Ռուսաստանում, դրա համար չեն թողնում որ էդ անասունները երկրից դուրս հանենք, իմ ուշքն ու միտքը էդ անասուններն են, յուրաքանչյուրը 450 հազար դրամ արժի, որի 50 տոկոսը պետությունն է տալու»։

Հարցին, թե ինչպե՞ս է վերաբերում Գեղամասարի նախկին համայնքապետ Հակոբ Ավետյանի ՔՊ-ին սատարելուն՝ Երանոսյանը պատասխանեց․ «Ի՞նչ ասեմ, չեմ խառնվում, իրենց գործն է, ինձ չի էլ հետաքրքրում, թե ով ում է սկսել սատարել, ինչ են մտածում, ինչ են անում։ ՄԱրդիկ փոփոխական են, ամեն անգամ մի բան փոփոխվում է իրենց մոտ, ես նման մարդկանց հետ ոչ կապ ունեմ, ոչ զրուցում եմ, ոչ էլ հարցնում։ Ադրբեջանցին եկել է մեր քթի տակ, իմ դարդ ու ցավը մեր երկիրն է, մեր վարուցանքը, մեր գյուղացուն օգնելը, կազմակերպչական աշխատանքները, օր ու գիշեր հետևում ենք, թե սահմանին ինչ իրավիճակ է, ինչ է կատարվում, փառք Աստծո, հիմա ամեն ինչ խաղաղ է, ու եթե այսպես լինի, այս տարի հողերը կմշակենք»։