Աշխարհն այսօր կանգնել է անորոշության առաջ, որը չափազանց վտանգավոր է․ Էրդողան
Sat, 18 Apr 2026 19:30:48 +0400
Աշխարհն այսօր առերեսվել է ուղղության ընտրության անորոշության ճգնաժամի առաջ եւ դա շատ լուրջ սպառնալիք է համաշխարհային հանրության համար։ Այս մասին հայտարարել է Թուրքիայի նախագահ Ռեջեփ Թայիփ Էրդողանը՝ Անթալիայի դիվանագիտական ֆորումի բացման արարողության ժամանակ։ Նա նշել է, որ միջազգային թատերաբեմին խնդիրների ծավալը շատ ավելին է, քան կարելի է պատկերացնել։ Սակայն եղած խնդիրներով հանդերձ՝ ըստ Էրդողանի, դիվանագիտությունը շարունակում է մնալ մարդկության գոյության եւ ապագայի հենարաններից մեկը։ Այն արդեն ավելին է, քան շահերի եւ խնդիրների պարզ քննարկումը։ «Այսօր աշխարհը գտնվում է ոչ միայն ուժի ճգնաժամի, այլ նաեւ՝ ուղղության ճգնաժամի մեջ։ Համակարգը, որը իբրեւ թե հիմնված էր կանոնների վրա, լռում է այնտեղ, որտեղ այդ կանոնները խախտվում են։ Մենք տեսնում ենք, որ կանոնների խախտումները հասել են իրենց գագաթնակետին՝ այսօրվա աշխարհում։ Այն մեխանիզմները, որոնք կոչված են պաշտպանելու մարդու իրավունքներն ու միջազգային անվտանգությունը՝ արդյունավետ չեն։ Անարդյունավետ են՝ լրջագույն ոտնձգությունների առաջ»,- շեշտել է Թուրքիայի նախագահը։