Ինչպես հայտնի է, Հայաստանի Պրեմիեր լիգայի 22-րդ տուրում տեղի ունեցած «Ուրարտու» – «Ալաշկերտ» հանդիպումից հետո «Ուրարտու» ֆուտբոլային ակումբը հանդես է եկել կոշտ հայտարարությամբ՝ չընդունելով խաղի վերջնական արդյունքը։

Ակումբի գլխավոր տնօրեն Դավիթ Շախբագյանը նշել է, որ 1:3 հաշվով պարտությունը չի կարելի արդար համարել, քանի որ այն, ըստ իրենց, ձևավորվել է մրցավարական լուրջ սխալների պայմաններում։ Ակումբը դժգոհություն է հայտնել մրցավարության որակից և օբյեկտիվությունից՝ ընդգծելով, որ այս խնդիրը շարունակում է մնալ հայկական ֆուտբոլի ամենացավոտ հարցերից մեկը։

«Ուրարտուում» համոզված են, որ տվյալ խաղը հերթական անգամ ցույց տվեց մրցավարության ցածր մակարդակը, ինչը խաթարել է հանդիպման բնական ընթացքը և վնասել մրցակցության արդար սկզբունքներին։ Ակումբում նաև նշել են, որ Հայաստանի ֆուտբոլի ֆեդերացիան բավարար հետևողականություն չի ցուցաբերում մրցավարական համակարգի բարելավման ուղղությամբ, ինչի արդյունքում ակնհայտ սխալները հաճախ մնում են առանց պատժի։

Ակումբը նաև մտահոգություն է հայտնել, որ մրցաշրջանի ավարտին մոտենալուն զուգահեռ նմանատիպ սխալները կարող են ազդել մրցաշարային աղյուսակի վրա՝ վտանգելով առաջնության արդարությունն ու թափանցիկությունը։

Հիշեցնենք, որ «Ալաշկերտը» սեփական հարկի տակ հաղթել էր «Ուրարտուին»՝ 3:1 հաշվով։ Խաղի ընթացքում «Ուրարտուն» ավարտել էր հանդիպումը 9 ֆուտբոլիստով․ առաջին խաղակեսում կարմիր քարտ էր ստացել Ալեքսանդր Միշիչը, իսկ ավելացված ժամանակում երկրորդ դեղին քարտի պատճառով հեռացվել էր նաև Նարեկ Աղասարյանը։

Հատկանշական է, որ նման հայտարարությունները չափազանց հազվադեպ են ոչ միայն հայկական, այլև համաշխարհային ֆուտբոլում։ Շատ քիչ են դեպքերը, երբ որևէ ակումբ բացահայտ կերպով հրաժարվում է ընդունել խաղի վերջնական արդյունքը՝ այն պայմանավորելով մրցավարական սխալներով։ Սովորաբար թիմերը սահմանափակվում են դժգոհություն հայտնելով կամ բողոքարկման գործընթաց սկսելով, սակայն արդյունքի լիակատար չընդունումը համարվում է բացառիկ քայլ, որը ընդգծում է իրավիճակի լրջությունը և առաջացած լարվածությունը։

Սակայն պետք է նշել, որ արդյունքի չընդունումը իրավական առումով բարդ գործընթաց է և հազվադեպ է հանգեցնում փաստացի փոփոխությունների։