Կմասնակցի՞ Իրանն ԱՄՆ-ի հետ բանակցությունների նոր փուլին․ հայտարարություն
Mon, 20 Apr 2026 15:00:51 +0400
Իրանի արտաքին գործերի նախարարության հայտարարության համաձայն՝ Միացյալ Նահանգների հետ հակամարտության կարգավորման բանակցությունների երկրորդ փուլ անցկացնելու որոշում դեռևս չի կայացվել։
Նախարարությունը ընդգծել է, որ Իրանը չի ճանաչում Միացյալ Նահանգների որևէ վերջնագիր և վճռականորեն կարձագանքի հետագա ագրեսիայի դեպքում։
Այս ֆոնին Իրանի նախագահ Մասուդ Փեզեշքիանը հայտարարել է, որ ռազմական դիմակայության շարունակությունը ո՛չ Թեհրանին, ո՛չ էլ Վաշինգտոնին օգուտ չի տալիս։ Նա ընդգծել է, որ չնայած ճնշումներն ու սպառնալիքները շարունակվում են, կարևոր է միաժամանակ փնտրել լարվածությունը նվազեցնելու դիվանագիտական ուղիներ։
«Պատերազմը ոչ մեկին ձեռնտու չէ, և սպառնալիքներին հակազդելիս անհրաժեշտ է օգտագործել բոլոր ողջամիտ և դիվանագիտական միջոցները՝ լարվածությունը նվազեցնելու համար։ Միևնույն ժամանակ, թշնամու նկատմամբ անվստահությունը և փոխազդեցության մեջ զգոնությունը մնում են կարևոր», – ընդգծել է Փեզեշքիանը, որի խոսքերը մեջբերել է նրա մամուլի ծառայությունը։
Ավելի վաղ Իրանի պետական լրատվական գործակալությունը՝ IRNA-ն, հայտնել էր, որ Թեհրանը հրաժարվել է մասնակցել Միացյալ Նահանգների հետ բանակցությունների երկրորդ փուլին։
Միաժամանակ Թրամփը հայտնել էր, որ ամերիկյան պատվիրակությունն արդեն Իսլամաբադում է։