Բաքուն «ցնցումների» մեջ է Բելգիայի և Նիդերլանդների որոշումներից․ աջակցել էին հայ գերիներին
Mon, 20 Apr 2026 17:45:55 +0400
Ադրբեջանը իր խիստ բողոքն է հայտնել Բելգիային և Նիդերլանդներին «նրանց խորհրդարանների կողմից ընդունված հակաադրբեջանական փաստաթղթերի վերաբերյալ, որոնք ազդում են երկրի ինքնիշխանության և Հայաստանի հետ խաղաղության գործընթացի վրա», գրում են ադրբեջանական ԶԼՄ-ները՝ հղում անելով երկրի ԱԳՆ-ին։
Ըստ Ադրբեջանի արտաքին գործերի նախարարության՝ «Բելգիայի և Նիդերլանդների Թագավորության դեսպաններ Ժյուլիեն դը Ֆրեպոնը և Մարիան դը Յոնգը առանձին կանչվել են Արտաքին գործերի նախարարություն։ Հանդիպումների ընթացքում ադրբեջանական կողմը իր խիստ բողոքն է հայտնել Բելգիայի և Նիդերլանդների խորհրդարանների կողմից 2026 թվականի ապրիլի 16-ին ընդունված փաստաթղթերի վերաբերյալ, որոնք, ինչպես նշվում է, ուղղված են Ադրբեջանի ինքնիշխանության և տարածքային ամբողջականության, ինչպես նաև Բաքվի և Երևանի միջև ընթացող խաղաղության գործընթացի խաթարմանը»։
«Այս փաստաթղթերը հիմնված են լիովին կեղծ և անհիմն գնահատականների վրա և ցույց են տալիս այդ մարմինների ներսում խորը արմատացած հակաադրբեջանական կողմնակալությունը», – նշել է Արտաքին գործերի նախարարությունը։
Ադրբեջանական կողմը նաև վճռականորեն մերժել է երկրի ինքնիշխան տարածքների վերաբերյալ կեղծ պնդումները, Հայաստանի տարածքային ամբողջականությունը խախտելու մեղադրանքները և հայկական ծագում ունեցող անձանց (Բաքվում պատանդառված ու շինծու մեղադրանանքներով Արցախի ռազմաքաղաքական ղեկավարների ու հայ մյուս գերիների մասին է խոսքը – խմբ․) անօրինական ազատազրկման մասին պնդումները։
«Հեգնական է, որ այս փաստաթղթերի ընդունումը համընկավ Ադրբեջանի և Հայաստանի խորհրդարանների խոսնակների վերջին հանդիպման հետ», – ընդգծել են գերատեսչությունում։
Բելգիական և հոլանդական կողմերին կոչ է արվել արդյունավետ միջոցներ ձեռնարկել՝ «կանխելու համար հակաադրբեջանական խմբերի կողմից երկկողմ հարաբերություններին վնասող խորհրդարանական գործունեության իրականացումը»։