Հարավային Կովկասում որեւէ պետության հետ ռազմավարական գործընկերության մասին խոսելը խնդրահարույց է
Tue, 21 Apr 2026 16:45:08 +0400
«Հրապարակի» զրուցակիցն ուկրաինացի քաղաքագետ Եվգենի Մագդան է։
– Ուկրաինայի նախագահը հայտնել է Մերձավոր Արևելքի մի շարք երկրների հետ երկարաժամկետ պաշտպանական պայմանագրերի շուրջ պայմանավորվածությունների մասին, ներառյալ՝ Սաուդյան Արաբիան, Կատարն ու ԱՄԷ-ն։ Նրա խոսքով, Drone Deal նախաձեռնության շրջանակներում նախատեսվում է անվազն 10 համաձայնագիր ուկրաինական սպառազինության արտահանման վերաբերյալ, ինչպես նաև համատեղ արտադրական գծերի ստեղծում։ Պատերազմի մեջ գտնվող Կիևն այդքան ներուժ ունի՞ և ի՞նչ է կարող են տալ այդ հավակնոտ ծրագրերը ձեր երկրին։
– Ցավոք, զենքի շուկայում հայտարարություններից մինչև պայմանագրերի ստորագրման ճանապարհը երկար է լինում: Ուկրաինան ձգտում է մտնել Պարսից (Արաբական) ծոցի շուկա, որտեղ լարվածությունը և զենքի պահանջարկի աճը շարունակվում են: Ուկրաինան անօդաչու թռչող սարքերի արտադրության և օգտագործման ճանաչված առաջատար է, և այն շատ բան ունի առաջարկելու արտահանման համար: Մենք հիմնականում հետաքրքրված ենք ուկրաինական պաշտպանական արդյունաբերության զարգացման համար ֆինանսական ռեսուրսներով։
– Զելենսկին նաև հայտարարել է, որ Ուկրաինան մտադիր է նման նախաձեռնություններով կենտրոնանալ Հարավային Կովկասի վրա։ Արդյո՞ք տեղյակ եք, թե նրա մատնանշած ռազմական համագործակցության համար տարածաշրջանի ո՞ր երկրներն են առաջնային դիտարկվում, Հայաստանի մասով, օրինակ, ծրագրեր կա՞ն։
– Անկեղծ ասած, այսօր Հարավային Կովկասում Ուկրաինայի դիրքն առանձնապես տպավորիչ չէ: Վրաստանի հետ հարաբերությունները, անկեղծ ասած, սառն են, դա փաստ է: Ադրբեջանի հետ ռազմավարական գործընկերությունը վատ է հիմնավորված կոնկրետ գործողություններով, քանի որ Թուրքիան շատ ավելի սերտ կապեր ունի իր գործընկերոջ հետ: Հայաստանի հետ շփումներն ավելի շուտ էպիզոդիկ են, հատուկենտ, ուստի Հարավային Կովկասում ռազմավարական գործընկերության մասին խոսելը խնդրահարույց է Ուկրաինայի համար։
– Իսկ ի՞նչ եք կարծում, Ռուսաստանի հետ բարդ հարաբերություններ ունեցող ՀՀ իշխանությունները կգնա՞ն այդ քայլին։
– Ես կարծում եմ, որ Հայաստանը խորհրդարանական ընտրություններից առաջ որևէ կտրուկ քայլ չի ձեռնարկի։
– Ուկրաինայի ԱԳ նախարար Անդրեյ Սիբիգան հայտարարել է, որ Կիևը Զելենսկի-Պուտին հանդիպումը կազմակերպելու խնդրանքով դիմել է Թուրքիային։ Լուկաշենկոն էլ Թրամփին առաջարկել է որպես խաղարար ռուս-Ուկրաինական բանակցությունների համար հարթակ օգտագործել Բելառուսը։ Իրանի հետ կապված պատերազմական իրավիճակի ֆոնին, այս փուլում ուժային ո՞ր կենտրոնը կարող է առավել արդյունավետ միջնորդ հանդես գալ։
– Անդրեյ Սիբիգայի հայտարարությունն արվել է Անթալիայի դիվանագիտական ֆորումի ժամանակ և, ամենայն հավանականությամբ, քաղաքական ակնարկ էր Էրդողանին: Լուկաշենկոն Կրեմլի ճանաչված դաշնակիցն է, և Ուկրաինան չի բանակցի բելառուսական հողի վրա։ Ես կարծում եմ, որ ռուս-ուկրաինական պատերազմը դադարեցնելու բանակցությունները ներկայումս փակուղու մեջ են, իսկ ելք գտնելը՝ դժվար։