Քոլեջի հեղինակության հետ է «խաղացել»
Tue, 21 Apr 2026 19:21:07 +0400
Գրել էինք, որ Իջևանի պետական քոլեջի երկարամյա դասախոս, գրող, լրագրող Զավեն Ալավերդյանը Ֆեյսբուքում բաց նամակ է հղել ՀՀ քաղաքաշինության, տեխնիկական և հրդեհային անվտանգության տեսչական մարմնի պետ Գարեգին Խաչատրյանին․ «Հայտնում եմ, որ Տավուշի Պ․ Տէվեճեան տարածաշրջանային քոլեջ-հիմնադրամի տնօրինությունը ի հեճուկս մի շարք ողջամիտ մարդկանց հորդորներին՝ դասերի ընթացքում փակում է քոլեջի բոլոր ելքերը՝ շուրջ 350 ուսանողներին և 80 աշխատակիցներին թողնելով արտակարգ իրավիճակների վտանգի տակ՝ հրդեհ, երկրաշարժ և այլն։
Խնդրում եմ ձեռք առնել համապատասխան միջոցառումներ՝ այս վտանգավոր իրավիճակը ի չիք դարձնելու և մեղավոր անձանց պատասխանատվության ենթարկելու համար»։
Զավեն Ալավերդյանից տեղեկացանք, որ այս բաց նամակից և դրա վերաբերյալ «Հրապարակում» հոդվածի հրապարակումից հետո քոլեջի տնօրենի պաշտոնակատար Մարգարիտ Պողոսյանն իրեն պաշտոնական գրություն է ուղարկել, որտեղ հանդիմանել է Ալավերդյանին, թե ինքը «խաղացել է քոլեջի հեղինակության հետ»։
Ալավերդյանը պատասխան գրությամբ հերքել է դա եւ հայտնել, որ ինքը նման նպատակ, մտադրություն չի ունեցել, նշել է, որ իր նպատակը եղել է առկա խնդրի լուծումը։
Զ․ Ալավերդյանը մեզ ասաց, որ «Հրապարակում» հոդվածի լույս տեսնելուց հետո մի քանի օր դասերի ընթացքում քոլեջի դռները չէին փակում, սակայն այժմ նորից սկսել են փակել, որ ուշացած ուսանողները չկարողանան մասնակցել դասերին, իսկ ներսում գտնվողները չկարողանան լքել քոլեջի շենքը: