Իրանը վստահ է՝ Իսրայելը թշնամանք է սերմանում Բաքվի և Թեհրանի միջև
Wed, 22 Apr 2026 14:30:12 +0400
Իսրայելը փորձում է թշնամանք սերմանել Թեհրանի և Բաքվի միջև։ Այս հայտարարությունն արել է Բաքվում Իրանի դեսպանությունը։
Ըստ հայտարարության՝ Իրանը կտրականապես հերքում է Իսրայելի ուժային և ռազմական կառույցների վերջին պնդումներն այն մասին, թե Իրանի հետ կապված որոշ անձինք կամ կազմակերպություններ հակաիսրայելական գործողություններ են ծրագրում մի շարք երկրներում, այդ թվում՝ Ադրբեջանի տարածքում։
«Սիոնիստական ռեժիմի գործողությունների վերլուծությունը, այդ թվում՝ 2025 թվականի հունիսին Իրանի դեմ 12-օրյա ռազմական ագրեսիայի և 2026 թվականի փետրվարի 28-ին մեկնարկած վերջին ագրեսիայի ընթացքում, ցույց է տալիս, որ այս ռեժիմը մշտապես ձգտում է ընդլայնել հակամարտության մասշտաբները և պատերազմը տարածել Իրանի հարևան տարածքների վրա, և այդ նպատակով նա կեղծ տեղեկություններ է տարածում և խաբուսիկ գործողություններ է իրականացնում, որոնք հայտնի են որպես «գործողություններ կեղծ դրոշի ներքո»»,- ասված է հայտարարության մեջ։
Նշվում է, որ առկա ապացույցները, Նախիջևանի վրա ԱԹՍ-ների կասկածելի հարձակումները, Կասպից ծովում նավահանգստային և նավագնացության ենթակառուցվածքների վրա հարձակումները, ինչպես նաև տարածաշրջանում տնտեսական գործունեությունն ապակայունացնելու փորձերը ապացուցում են, որ Իսրայելում նման ծրագրեր կան։