Բյուրեղավանի համաճարակի առեղծվածը
Thu, 23 Apr 2026 12:35:45 +0400
Վերջին օրերին Բյուրեղավանի քաղաքային պոլիկլինիկա են դիմել հարյուրավոր քաղաքացիներ՝ սրտխառնոցի, փսխման, փորլուծության և ջերմության բարձրացման գանգատներով։ Պոլիկլինիկայի շտապ օգնության ծառայությունը հարյուրավոր կանչեր է սպասարկել, քաղաքացիներից մի մասին տեղափոխելով «Աբովյան» ԲԿ։
«Հրապարակի» հետ զրույցում պոլիկլինիկայի տնօրեն Արմեն Վարդումյանն ասաց, որ այս պահին էլ դեռ կանչեր ստանում են․ «Երեկ 27 անձ հոսպիտալացվել է, իսկ այսօր կանչերի ինտենսիվությունը պակասել է, իմ կարծիքով այսօր արդեն դեպի մարում կգնա։ Հոսպիտալացված քաղաքացիների վիճակը գնահատվում է բավարար և միջին ծանրության»։
Անդրադառնալով ջրի փորձանմուշների հետազոտման պատասխաններին՝ Վարդումյանը նշեց․ «Դեռևս պաշտոնական տեղեկատվություն չունեմ ՀՎՀԱԿ-ից, իսկ ոչ պաշտոնական գիտեմ, որ ջուրը մաքուր է եղել։ Ես որևէ այլ վարկած չունեմ, թե ինչից կարող է լինել»։
«Հիվանդությունների վերահսկման և կանխարգելման ազգային կենտրոնից» մեզ հետ զրույցում հայտնեցին, որ դեռևս փորձաքննությունների արդյունքները պատրաստ չեն․ «Մենք նմուշառում իրականացրել ենք ինչպես ջրից, այնպես էլ կենսանմուշներ են վերցվել և հետազոտությունները ըստ ընթացակարգի իրականացվում են»։ Հարցին՝ հնարավո՞ր է, որ ջրից չլինի՝ արձագանքեց․ «Եթե հետազոտություններ են իրականացվում, իհարկե հնարավոր է, եթե ոչ՝ հետազոտության անհրաժեշտություն այլևս չէր լինի, կհաստատվեր որևէ մեկ տեսակետ»։
Նշենք, որ բյուրեղավանցիների կարծիքով համաճարակային վիճակի պատճառը խմելու ջուրն է, որին կոյուղաջրեր են խառնվել։