Մեր ազգի նկատմամբ երկրորդ ցեղասպանությունն էլ է եղել
Fri, 24 Apr 2026 14:15:18 +0400
«Ուժեղ Հայաստան» կուսակցության անդամ Գոհար Մելոյանը Ծիծեռնակաբերդի հուշահամալիրում լրագրողների հետ զրույցում հայտարարել է, որ Հայոց ցեղասպանության վերաբերյալ գնահատականները վաղուց արդեն ձևավորված և գիտականորեն հիմնավորված են, և որևէ պաշտոնյա չի կարող դրանց նոր մեկնաբանություն տալ։
Նրա խոսքով՝ ցեղասպանության փաստը հաստատված է երկար տարիների գիտական ուսումնասիրություններով և ճանաչված է բազմաթիվ երկրների կողմից՝ որպես պատմական իրողություն և մարդկության դեմ կատարված ծանր հանցագործություն։
Մելոյանը նաև նշել է, որ իր գնահատմամբ՝ վերջին տարիների իրադարձությունները, մասնավորապես Արցախի հայաթափումը, կրում են ծանր հետևանքներ և պարունակում են ցեղասպանության որոշ հատկանիշներ։ Նրա կարծիքով՝ արցախցիների բռնի տեղահանումը կարելի է դիտարկել որպես նոր ողբերգական դրսևորում հայ ժողովրդի նկատմամբ։
Նա ընդգծել է, որ այս հարցերի շուրջ քաղաքական մոտեցումները չպետք է փոխեն պատմական փաստերի բովանդակությունը, իսկ հասարակությունը պետք է պահպանի հիշողությունը և գնահատի տեղի ունեցած իրադարձությունները։
Արցախի հայաթափումը ևս ուներ ցեղասպանության տարրեր, և կարելի է արցախցիների բռնի տեղահանումը ևս որակել որպես երկրորդ ցեղասպանություն մեր ազգի նկատմամբ»,- ասել է նա: