Monument Watch-ը ահազանգում է․

«Qərbi Azərbaycan TV» և «Western Azerbaijan Community» հարթակներում հրապարակված նյութերի համաձայն՝ 2026 թվականի ապրիլի 14-ին Բաքվում՝ Ադրբեջանի նկարիչների միության Վաջիհա Սամեդովայի անվան ցուցասրահում, անցկացվել է նկարիչ Ալի Իսմայիլ Ալիևի «Արևմտյան Ադրբեջան» խորագրով անհատական ցուցահանդեսը։ Միջոցառումը կազմակերպվել է Ադրբեջանի նկարիչների միության, «Արևմտյան Ադրբեջանի համայնքի» և Ադրբեջանի պետական տնտեսագիտական համալսարանի համատեղ նախաձեռնությամբ։ (https://www.facebook.com/QAicmasi/posts/pfbid02B2RZjH7rHHP6M641UTWu9HjvnVcxcHwmMjZGQzwts88ahHJFLEP4FfVC1D8wZyLal):

Ցուցահանդեսում ներկայացված աշխատանքները, ըստ կազմակերպիչների, արտացոլում են «Արևմտյան Ադրբեջանի» պատմական իրողությունները, ազգային և հոգևոր արժեքները։ Ներկայացված նկարները, որոնք ընդգրկում են հեղինակի ստեղծագործության տարբեր փուլեր, ներկայացվում են ոչ միայն որպես գեղարվեստական գործեր, այլև որպես հիշողության պահպանման և փոխանցման միջոց։

Միջոցառմանը մասնակցել են պետական և հասարակական տարբեր շրջանակների ներկայացուցիչներ՝ այդ թվում պատգամավորներ, մտավորականներ և «Արևմտյան Ադրբեջանի համայնքի» ղեկավար կազմի անդամներ։ Բացման խոսքում շեշտվել է նման նախաձեռնությունների կարևորությունը «պատմական հիշողության պահպանման» և ապագա սերունդներին փոխանցման համատեքստում։

Ելույթ ունեցողները, մասնավորապես, ընդգծել են, որ ցուցադրվող ստեղծագործությունները նպաստում են «կորուսյալ հայրենիքի» հետ կապի պահպանմանը և ազգային ինքնության ձևավորմանը՝ արվեստի միջոցով։

Հատկանշական է, որ նման միջոցառումները տեղի են ունենում պետական կառույցների աջակցությամբ, ինչը վկայում է մշակութային գործիքների օգտագործման մասին՝ քաղաքական ու պատմական նարատիվների ձևավորման և տարածման գործընթացում։

Նշենք, որ, ըստ ներկայացման, նկարիչ Ալի Իսմայիլ Ալիևը ծնվել է 1960 թվականին նրանց կողմից «Արևմտյան Ադրբեջանի» Բասարկեչար անվանվող շրջանում, որը գտնվում է ներկայիս Հայաստանի Հանրապետության Գեղարքունիքի մարզի Վարդենիսի տարածաշրջանն է։ Ցուցահանդեսի շրջանակում ներկայացված աշխատանքները, ըստ կազմակերպիչների, արտահայտում են նկարչի կարոտը հայրենի Գյոյչայի շրջանի և այլ «պատմական տարածքների» նկատմամբ, ինչպես նաև գեղարվեստական ձևով այդ տարածքներ «վերադառնալու» գաղափարը։ Նկարներում պատկերված են Երևանը՝ Արարատ լեռան ֆոնին՝ բազմաթիվ մզկիթներով, Վարդենիսի լեռնաշղթան, ինչպես նաև գրեթե բոլոր աշխատանքներում ընդգրկված է Սևանա լիճը։

Ըստ նույն աղբյուրների՝ ցուցադրվող նկարները ներկայացվում են ոչ միայն որպես գեղագիտական արժեք ունեցող ստեղծագործություններ, այլև որպես ազգային-հոգևոր հիշողության պահպանման և այն ապագա սերունդներին փոխանցելու միջոց (https://www.facebook.com/watch/?v=4473078079635076):

«Արևմտյան Ադրբեջան» ձևակերպումը գիտական հիմք չունեցող քաղաքական, արհեստական հորինվածք է, որը կիրառվում է Հայաստանի Հանրապետության տարածքի նկատմամբ։ Ըստ այդ դիրքորոշման՝ նման մոտեցումները, հատկապես արվեստի և մշակույթի ոլորտում, նպաստում են խեղաթյուրված պատմական պատկերացումների ձևավորմանը և տարածմանը։ Միաժամանակ այսպիսի տերմինաբանության օգտագործումը մշակութային հարթակներում դիտարկվում է որպես քաղաքականացված նարատիվի տարածման միջոց։