Արհեստական բանականության տեխնոլոգիայի օգնությամբ հնարավոր է եղել վերծանել եւ թարգմանել Անգլիայի հնագույն սիրային նամակը։ Այն թվագրվում է 1477 թվականով։ Որքան էլ զարմանալի է, նամակում խոսվել է մի ֆինանսական սկանդալի մասին, որը համարյա խափանման եզրին է հասցրել 15-րդ դարում կայանալիք մի ամուսնություն։ Պարզվել է, որ նամակի հեղինակը՝ ազնվական կին Մարգերի Բրյուսն է, ով նամակը գրել է իր փեսացուին՝ Ջոն Փաստոն 3-րդին։ Նամակի լեզուն բավականին բարդ միջին անգլերենով է։

Նամակում ասվում է, որ հարսնացուի հայրը հրաժարվել է ավելացնել դստեր օժիտը, կայանալիք ամուսնությունը դնելով հարցականի տակ։ Աղջկա մայրը խնդրել է հորը զիջել, սակայն վերջինս աննահանջ է եղել։ Մարջերին էլ իր հերթին հաստատակամություն է ցուցաբերել եւ հայտարարել փեսացուին, որ հավատարիմ կմնա նրան։ Նա գրել է Ջոնին, որ չի թողնի փեսացուին, եթե նույնիսկ նա ունենար երկու անգամ ավելի քիչ օժիտ։

Միաժամանակ՝ խնդրել է նամակի բովանդակությունը պահել գաղտնի։ Նամակի վերջում Մարջերին Ջոնին անվանել է իր «սիրելի Վալենտին»։ Մասնագետները պարզել են, որ զույգը իրականում ամուսնացել է նույն 1477 թվականին՝ տարվա վերջում։ Նամակը մաս է կազմում «Փաստոնների արխիվի», որը բաղկացած է ավելի քան 1000 փաստաթղթից եւ ներկայացնում է «Վարդերի պատերազմի» ժամանակներում անգլիական ազնվականության կյանքն ու կենցաղը։ Փաստաթղթերը թվագրված են 1422-1509 թվականներով։