«Հրապարակ». Նա մրցակցության մեջ է մտել Տեր-Պետրոսյանի հետ
Wed, 29 Apr 2026 10:45:06 +0400
Նիկոլ Փաշինյանն իր էջում տեսանյութ է հրապարակել ՆԳ նախարար Արփինե Սարգսյանի մասնակցությամբ՝ ՀՀ նոր կենսաչափական անձնագրի մասին։ «Նոր կենսաչափական անձնագիրն արտացոլում է մեր ինքնությունը, պատմամշակութային ժառանգությունը եւ պետականությունը»,- տեսանյութին կից՝ գրել է վարչապետը։ Նոր նմուշի կենսաչափական անձնագրերը եւ նույնականացման քարտերը 2026-ի աշնանից կլինեն շրջանառության մեջ։ Ներկայացրել են նոր կենսաչափական անձնագրի արտաքին տեսքը, այն դառնալու է կարմիր։ Փաշինյանը նշել է, որ կարմիրը միջազգային պրակտիկայում ամենատարածված գույներից է։
ԱԺ նախկին պատգամավոր Նաիրա Զոհրաբյանը «Հրապարակի» հետ զրույցում ասում է․ «Այս ամենը, ինչպես որ ես կարծում էի, կապված է վիզաների ազատականացման հետ։ Իմ վերջին հանդիպման ժամանակ՝ Քյոլնում, տարբեր պաշտոնյաների հետ, ինձ վրա այնպիսի տպավորություն թողեց, որ Հայաստանում վիզաների ազատականացման հարցը լուծվելու է կայծակնային արագությամբ։ Ինձ հասած տեղեկություններով՝ մինչեւ 2028 թվականը մենք ունենալու ենք վիզաների ազատականացման ռեժիմ, եթե որեւէ բան չխանգարի նախքան այդ։ Ինչ վերաբերում է սիմվոլիկաների փոփոխությանը, Արարատ լեռան պատկերը հանելուն եւ այլն, այստեղ կա մեկ այլ կոմպոնենտ՝ վիզաների ազատականացումից զատ, առկա է նաեւ Նիկոլի հոգեբանական գործոնը։ Նա անդադար խոսում է ինչ-որ չորրորդ հանրապետության մասին։ Նա մրցավազքի մեջ է մտել Լեւոն Տեր-Պետրոսյանի հետ։ Իր ընտանիքի անդամը անգամ «գիտնական ոջիլ» էր անվանել նրան։ Քաղաքական սլենգում առաջին նախագահին ՀԱԿ-ի ներկայացուցիչներն անվանում են հիմնադիր նախագահ, ես տպավորություն ունեմ, որ եթե Նիկոլը վերընտրվեց, ապա չի լինելու այլեւս երրորդ հանրապետություն, իսկ չորրորդ հանրապետություն ասվածը պաշտոնապես լեգիտիմացվելու է՝ սահմանադրությամբ, Նիկոլ Փաշինյանն իրեն հռչակելու է չորրորդ հանրապետության հիմնադիր վարչապետ։ Նրա ներկայացրած սիմվոլիկաները՝ հոգի, հավատք եւ այլն, լինելու են իր նոր հանրապետության ատրիբուտիկան։ Նա ուզում է լինել ամեն ինչի կնքահայրն ու նախաստեղծը, այդ թվում՝ անձնագրի դիզայնի, գույնի եւ այլն։ Նա անդադար ուզում է ինչ-որ մի բանով մնալ հայ ժողովրդի պատմության մեջ, սակայն իրականում մնացել է պատմության մեջ՝ տխրահռչակ ձեւով։ Եթե նույնիսկ իրեն հաջողվի վերարտադրվել, իսկ նայելով ընդդիմության ոչ հաջող մարտավարությանը, կվերարտադրվի, իրեն հաջողվելու է գնալ դեպի չորրորդ հանրապետություն։ Նա մի անգամ հարցրեց․ «Այս թերմա՞ցքն եք համարում հայրենիք»։ Նա իր ամբիցիաների ու փառասիրության հարցն է լուծում, դրան էլ գումարած՝ վիզաների ազատականացման հարցը։ ԵՄ-ն, որպես բոնուս, Հայաստանին ուզում է արագացված կերպով վիզաների ազատականացման հասցնել՝ ի հեճուկս Վրաստանի, որ կզրկենք ձեզ բոնուսից եւ այն կտանք Հայաստանին»։