Ապշում եմ, թե դատավորներն ու քննիչներն ինչպես են այդ ամենի տակ մտնում
Wed, 29 Apr 2026 20:15:10 +0400
Ռազմական փորձագետ Դավիթ Ջամալյանին հարցրեցինք. «Հայտնի հետախույզ, պատերազմների մասնակից Արթուր Ավանեսյանին` Կանդազին, երկու ամսով կալանավորեցին ինչ-որ մի անհասկանալի ձայնագրության համար: Այսօր տեղեկացանք, որ նա հացադուլ է հայտարարել: Փաստացի ստացվում է, որ Նիկոլ Փաշինյանը հայ հերոսներին շարունակում է վարկաբեկել ու դատել, իսկ ազերիներին արժանացնում է ջերմ հյուրընկալության, նրանք ուղիղ Բաքվից Երեւան են ժամանում` «Զվարթնոցում» վայրէջք կատարելով:
Ջամալյանն ասաց. «2009 թվականից ես Կանդազի հետ ընկերություն եմ անում: Ամեն անգամ սահման գնալիս, ես նրա հետ ինչ-որ մի հենակետում պարտադիր հանդիպում էի: 2014 թվականի օգոստոսին, երբ սահմանագծում լարված իրավիճակ էր, նախագահները պետք է հանդիպում ունենային, Կանդազը կարողացավ կանգնեցնել պրոցեսը: Նա խոր մթության մեջ մտավ խրամատ ու չորս-հինգ մետր առաջ գնալով ձուլվեց մթության մեջ: Ես մնացի ապշահար, թե այդ մթության մեջ ինչեր կարողացավ անել այդ մարդը: Նվիրյալ է նա:
Ինչի՞ համար են նրան կալանավորել` էստեղից-էնտեղից իրար կպցրած մի խոսակցության համար, որտեղ չկա հանցակազմ անգամ: Իրավաբան պետք չէ լինել հասկանալու համար, որ Կանդազի գործում չկան հիմքեր: Քաղաքական ուժերը մշտապես էլ մարդկանց խոստումներ են տալիս, բայց ինչպե՞ս կարելի է համարել դա ընտրակաշառք: Ընտրակաշառքը ենթադրում է կոնկրետություն, տվեցիր մի բան, ստացար մեկ այլ բան, այդ ձայնագրության մեջ չկա որևէ կոնկրետություն, չկա պայմանավորվածության մասին խոսք: Սա բացահայտ քաղաքական պատվեր է, ապշում եմ, թե դատավորներն ու քննիչները ինչպես են այդ ամենի տակ մտնում:
Եթե իշխանություն փոխվի, մեր դատական համակարգը պետք է լուրջ փոփոխությունների ենթարկվի: Այս մոտեցումը ուղղակի պետք է արմատախիլ արվի: Կանդազն այնպիսի փորձությունների միջով է անցել, որ ես վստահ եմ, որ նա չի կոտրվելու, ավելի է ուժեղանալու: Այս իշխանություններից, ի վերջո, հանրությունն այնքան է զզվել, որ ոչ մեկին չկա նյութապես շահագրգռելու անհրաժեշտություն, որպեսզի գնան ընտրության և Նիկոլին ձայն չտան: Մարդիկ առանց այդ էլ հոգնել ու զզվել են այդ չարիքից»: