Երեկ Նիկոլ Փաշինյանը Գեղարքունիքի մարզի մի շարք համայնքներով էր շրջում, ստուգում էր համայնքներում ամիսներ առաջ կառուցված մանկապարտեզներն ու դպրոցները:

Պարզ է, որ դա արվում էր ընտրությունների շեմին քարոզչության շրջանակներում, որպեսզի ցույց տա, թե Գեղարքունիքում ինչ «հզոր» բանակ է իրեն աջակցում:

Նա այցելեց նաև Գեղարքունիքի մարզի Վարդենիկ համայնքի մանկապարտեզ, որը կառուցվել էր 2025 թվականին: Մանկապարտեզի բակում Փաշինյանին մի քանի շարքով դիմավորեցին դպրոցական երեխաները՝ պայուսակներն ուսերին: Երեխաների հետեւում շարք էին կանգնել նաեւ ուսուցիչները, դպրոցների տնօրենները:

Ինչու են աշխատանքի ժամին, թողել աշխատանքը և եկել Փաշինյանին դիմավորելու, հարց ուղղեցինք Վարդենիկ գյուղի Ա. Օհանյանի անվան N2 hիմն. դպրոցի տնօրեն՝ Արգամ Բադալյանին. «Պլանավորած այց էր, համագյուղացիները դիմավորել են, ես աշխատանքի եմ եղել»:

Բայց կադրերում պարզ երևում է, որ Դուք այդտեղ ներկա եք. «Հա, մի պահ ներկա եմ գտնվել, ողջունել եմ, հետո իմ աշխատանքին գնացել»:

Աշակերտներին ուղղորդե՞լ էիք, որ Փաշինյանին դիմավորեն. «Աշակերտներին մենք չենք հրահանգել, եթե ուշադիր լինեք, ցածր դասարանի աշակերտներ են եղել, դասերից հետո գնացել են տուն, բայց ճանապարհին տեսել են հավաքված մարդիկ՝ գնացել են էնտեղ, համայնքի մանկապարտեզի բացումն էր, մենք երկար տարիներ մանկապարտեզ չենք ունեցել»:

«Ամբողջ կոլեկտիվով և աշակերտները գնացել էինք դիմավորելու վարչապետին, ովքեր որ դասի են եղել, չեն եկել»,- մեզ հետ զրույցոււմ ասաց Վարդենիկի Ռ. Հովհաննիսյանի անվան N1 հիմնական դպրոցի տնօրեն Թաթուլ Ալոյանը:

Աշակերտներն ավելի շատ էին, քան գյուղացիները. «Դրանք իմ երեխաները չէին, մի 20 մետր հեռավորության վրա էլի դպրոց կա՝ այդ դպրոցի երեխաներն էին: Իմ դպրոցի երեխաներից մի քանի հոգի են ներկա եղել, իմ երեխաները իրենց դասին են եղել»:

Վարդենիկը Մարտունու համայնքապետ Հովհաննես Հովեյանի ծննդավայրն է: Հովհաննես Հովեյանը 2000-2005թթ. եղել է Վարդենիկի գյուղապետարանի բաժնի ղեկավար, 2005 թվականից ղեկավարել է Վարդենիկ համայնքը: 2021 թվականի խոշորացումից հետո դարձել է Մարտունի խոշորացված համայնքի ղեկավար, իսկ իր փեսային՝ Արմեն Ավետիսյանին նշանակել է Վարդենիկ վարչական համայնքի ղեկավար: Արմեն Ավետիսյանին հարցրինք, թե ով է այդ բարերարը որ մանկապարտեզի շենքը գնել է ու նվիրել համայնքին. «Առաջին սեփականատերը էլի դրսի անձնավորություն ա եղել, նախկին սեփականատիրոջից անցել է Աբրահամ Հովեյանին՝ քաղաքապետ Հովհաննես Հովեյանի եղբորը, նա էլ նվիրել է համայնքին: Նա Տյումենի հայ համայնքի ղեկավարն է, այնտեղ ունի հայկական դպրոց, մշակույթ, եկեղեցի»:

Հարց է առաջանում, ինչու տարիներ շարունակ լինելով Վարդենիկ համայնքի ղեկավար, Հովհաննես Հովեյանը չի մտածել մանկապարտեզի շենքի վերակառուցման մասին, ինչու հենց ընտրություններից առաջ վերակառուցեց մանկապարտեզի շենքը: 2005-ից նախկին «թալանչիների» համար աշխատած, ՀՀԿ-ին ուրացած, ՔՊ-ի «կրոնն» ընդունած Հովեյանն իր ծննդավայրում բուռն գործունեություն է ծավալել, որ ընտրությունների շեմին արժանանա վարդենիկցիների վստահությանը: