Կենտրոնական ընտրական հանձնաժողովը ապրիլի 30-ի արտահերթ նիստում որոշել է 2026 թվականի հունիսի 7-ի հերթական ընտրություններին մասնակցելու նպատակով առաջադրված քաղաքական 8 ուժի 48 ժամ տալ՝ թերի փաստաթղթերը շտկելու համար։
Շտկված փաստաթղթերը պետք է ներկայացվեն մինչեւ մայիսի 2-ը, ժամը 18։00-ն։ Այդ ուժերն են՝ «Ազգային ժողովրդավարական բևեռ» համահայկական կուսակցություն, «Հայ ազգային կոնգրես» կուսակցություն, «Հանրապետություն» կուսակցություն , «Ալյանս» առաջադիմական ցենտրիստական կուսակցություն, «Դեմոկրատիա, օրենք, կարգապահություն» կուսակցություն, «Քոչարի ազգային վերածնունդ և ազգի զարթոնք» կուսակցություն, «Հանուն Հանրապետության ժողովրդավարության պաշտպանների դաշինք» կուսակցություն, «Նոր ուժ» ռեֆորմիստական կուսակցություն: Առաջադրված կուսակցությունների/դաշինքների ընտրական ցուցակների գրանցումն իրականացվելու է մայիսի 3-ի արտահերթ նիստում։

«Հանրապետություն» կուսակցության անդամ Անի Խաչատրյանից «Հրապարակը» հետաքրքրվեց` ի՞նչ թերություն է հայտնաբերել ԿԸՀ-ն «Հանրապետություն» կուսակցության ներկայացրած փաստաթղթերում: Խաչատրյանը մեզ հետ զրույցում անդրադառնալով թեմային, ասաց. «Մեր ներկայացրած փաստաթղթերում մեկ հոգու դիպլոմի միջուկը ընդամենը դրված չի եղել, ժամեր անց կավելացնենք այն և խնդիրը կշտկվի: Այլ որևէ խնդիր չի հայնաբերվել մեր փաստաթղթերում: Խոսքը 77 համարի միջուկն է եղել խնդիրը, եթե չեմ սխալվում: Ասեմ, որ սովետական տարիներին տրված դիպլոմների դեպքում միջուկների առկայությունը պարտադիր է, որպեսզի հայերենի իմացության հետ կապված խնդիր չառաջանա, բայց, օրինակ, Հայաստանի Հանրապետության բուհերի պարագայում չկա նման խնդիր: Ասեմ, որ ինչքանով ես եմ տեղյակ, բոլոր այն ուժերին, որոնց 48 ժամ ժամանակ են տվել, գրեթե նույն խնդիրն է հայտնաբերվել: Մեկ-երկուսինն է, որ այլ խնդիր է եղել, բայց մեծ մասի խնդիրները կապված են դիպլոմի միջուկի հետ, ինչ-որ մեկն էլ կարծեմ բանկային հաշվի հետ կապված խնդիրներ է ունեցել: Դրանք ընդամենը տեխնիկական խնդիրներ են, որոնք անպայման կշտկվեն, ամեն դեպքում, եթե անգամ տվյալ անձի դիպլոմի միջուկը չներկայացնենք էլ ԿԸՀ, ուղղակի նրա թեկնածությունն է կասեցվելու, ուրիշ ոչ մի խնդիր»: