Տեր կանգնենք ժողովրդավարությանը և իրավունքներին. Ակցիա է մեկնարկել
Mon, 04 May 2026 08:59:22 +0400
«Տե՛ր կանգնենք ժողովրդավարությանը և իրավունքներին Հայաստանում» նախաձեռնությունը, որը համախմբել է Հայաստանի քաղաքացիական հասարակության և քաղաքական դաշտի լայն շրջանակ՝ հասարակական կազմակերպություններ, կուսակցություններ և բազմաթիվ անհատներ՝ ձևավորել է կարևոր միասնական դիրքորոշում հիմնարար հարցերի շուրջ և եվրոպական քաղաքական համայնքի 8֊րդ գագաթաժողովի ընթացքում նախաձեռնության ներկայացուցիչները պլանավորում են անցկացնել շարունակական խաղաղ ակցիաներ՝ ուշադրություն հրավիրելու մի շարք խնդիրների վրա։
Ակցիաների մասնակիցները, ինչպես իրենց նախորդիվ տարածած հայտարարությունում է ասվում դուրս են գալիս` ցույց տալու իրականությունը, որը հաճախ փորձում են չտեսնել։
«Հայաստանում այսօր կան խնդիրներ, որոնք չեն կարող անտեսվել՝ քաղաքական բանտարկյալներ, դատական համակարգի նկատմամբ վերահսկողություն, ոստիկանական բռնություններ, խոսքի ազատության սահմանափակումներ, եկեղեցու նկատմամբ ճնշումներ և հասարակության մեջ ատելության խոսքի տարածում։ Միևնույն ժամանակ՝ Արցախում շարունակվում է հայկական քրիստոնեական մշակութային ժառանգության ոչնչացումը, իսկ արցախցիների իրավունքները մնում են անպաշտպան»,- ասվում է նախաձեռնության նախորդիվ տարածած հայտարարության մեջ։
Այս ակցիան, ըստ մասնակիցների ու նախաձեռնողների ուղերձ է՝ միջազգային հանրությանը, եվրոպական առաջնորդներին և բոլոր նրանց, ովքեր պատրաստվում են գալ Հայաստան Եվրոպական քաղաքական համայնքի գագաթնաժողովի շրջանակում։
«Մենք այստեղ ենք՝ որ ցույց տանք իրական պատկերը, ոչ թե ներկայացվածը, այլ եղածը» ասվում է նախաձեռնության տարածած հայտարարության մեջ։ Նախաձեռնության հրավիրած ակցիաները բաց են միանալու բոլոր ցանկացողների համար։