Ինչ է ասել Ալիևը տեսակապով
Mon, 04 May 2026 12:41:44 +0400
Ադրբեջանի նախագահ Իլհամ Ալիևը, ով Եվրոպական քաղաքական համայնքի 8-րդ գագաթնաժողովին մասնակցում է տեսակապի միջոցով, իր ելույթում հայտարարեց, որ Հայաստանը և Ադրբեջանը արդեն ավելի քան ինը ամիս է ապրում են խաղաղ պայմաններում և փորձում են աստիճանաբար ամրապնդել խաղաղ համակեցությունը։
Նրա խոսքով՝ անցած տարվա օգոստոսին Վաշինգտոնում երկու երկրների միջև ստորագրվել է ընդհանուր հռչակագիր, որի ստորագրմանը որպես վկա մասնակցել է նաև ԱՄՆ նախկին նախագահ Դոնալդ Թրամփը։ Ալիևի գնահատմամբ՝ այդ փաստաթուղթը խաղաղ գործընթացի կարևոր փուլ է, և ներկայում խաղաղությունը կողմերի համար արդեն իրական իրականություն է։
Ադրբեջանի նախագահը նաև նշեց, որ վերջին շրջանում Ադրբեջանից Հայաստան է տեղափոխվել մի քանի հազար տոննա բեռ, այդ թվում՝ նավթամթերք, ինչը, նրա խոսքով, համագործակցության նոր հնարավորությունների նշան է։
Ալիևը խոսեց նաև տարածաշրջանային ենթակառուցվածքային ծրագրերի մասին՝ նշելով, որ նախատեսվող երթուղին, որը կապվելու է «Միջին միջանցքի» հետ, անցնելու է Հայաստանով և կապելու է Ադրբեջանը Նախիջևանի հետ։
Անդրադառնալով Արցախին՝ նա հայտարարեց, որ 2023 թվականի սեպտեմբերին Ադրբեջանը վերջ դրեց այնտեղ ձևավորված սեպարատիզմին։ Նրա խոսքով՝ չնայած որոշ ուժերի փորձերին՝ խոչընդոտելու խաղաղ գործընթացը, Ադրբեջանը շարունակում է իր խաղաղ օրակարգը, և նույնիսկ հայկական կողմի ելույթները, ըստ նրա, ընդգծում են այդ ուղղությունը։
Ելույթի ավարտին Ալիևը մասնակիցներին հրավիրեց 2028 թվականի մայիսին Ադրբեջանում նախատեսված գագաթնաժողովին՝ նշելով, որ Բաքվի թեկնածությունը աջակցություն է ստացել նաև Հայաստանի կողմից։