Եկան, տեսան, նկարվեցին, հետո՞
Tue, 05 May 2026 09:00:06 +0400
Նայում եմ հաճույքից հալվող, ժպիտից շողացող դեմքով Նիկոլ Փաշինյանին եւ փորձում եմ հասկանալ` ի՞նչն է այսպես երջանկացրել այս մարդուն, որի դեմքը հայի, արցախցու, հայկական ընդդիմության, հայկական արժեքների, հայոց եկեղեցու մասին խոսելիս աղավաղվում է եւ չարությունից մթագնում:
Հասկացանք, որ մի քանի հազար լուսանկար արվեց՝ յուրաքանչյուր եվրոպացի պաշտոնյայի հետ մի քանի անգամ․ հատուկ դրա համար ստենդ էին կառուցել, եւ բոլոր հնարավոր դիրքերից լուսանկարվեցին, ու տարածեցին: Ոնց որ հետեւորդների քանակից է սիրտը փառավորվում, այդ լուսանկարների առատությունից էլ երեւի գոհացավ:
Եվրոպացի որոշ պաշտոնյաներ նաեւ սեր բացատրեցին, գլուխը շոյեցին, ուսին թփթփացրին, որ ուշիմ աշակերտի նման կատարել է տնային աշխատանքը եւ ռուսներից հնարավորինս դիստանցավորվել: Նաեւ դեմ չի եղել, որ Վլադիմիր Զելենսկին գա Հայաստան եւ հայկական ամբիոնից Պուտինին սպառնալիքներ ուղղի:
Տեսանք նաեւ, որ որոշ արեւմտամետների ոգեւորությանը չափ չկար` րոպեում 10 ստատուս էին գրում, շշպռում հակառակն ասող, հնարավոր հետեւանքներից զգուշացնող մարդկանց: Իշխանության եւ նրա սատելիտների տրամադրություններից կարելի էր հասկանալ, որ հունիսի 7-ի ընտրություններում արդեն իրենց հաղթած են զգում եւ համարում են, որ այս գագաթնաժողովն էականորեն ավելացրեց իրենց քվեների քանակը:
Բայց ես, անկեղծ ասած, չեմ հասկանում, թե ինչ շահեց այս ամենից Հայաստանը: Եկան, տեսան, նկարվեցին, ասացին, որ Հայաստանը Եվրոպայի սրտում է եւ հոգու մեջ: Իսկ ի՞նչ է լինելու դրանից հետո: Կարողանալո՞ւ են մեր եվրոպացի բարեկամները զսպել Ալիեւի եւ մեր մյուս թշնամիների ախորժակը: Այն Ալիեւի, որը տեսակապով միացավ գագաթնաժողովին ու վիրավորեց, նվաստացրեց ե՛ւ հայերին, ե՛ւ եվրոպացիներին: Կարողանալո՞ւ են նվազեցնել Ռուսաստանից ակնկալվող պատժամիջոցների աղետալի ազդեցությունը մեր երկրի վրա: Կարողանալո՞ւ են մեզ զինել, մեր անվտանգության հարցերում օժանդակել: Մեզ ընդգրկելո՞ւ են Եվրամիության կազմում, վիզաների ազատականացում լինելո՞ւ է: Արցախցիների վերադարձին հետամուտ լինելո՞ւ են: Արցախի տարածքում մեր մշակութային արժեքների ոչնչացումը կանխելո՞ւ են: Ի՞նչ կոնկրետ հետեւանք եւ օգուտ ենք արձանագրելու եվրոպական պաշտոնյաների այս վոյաժից: Թե՞ սա նրանց համար հերթական էկզոտիկ երկիրն էր, որտեղ երկու հետաքրքիր օր անցկացրին եւ որը կարող են իրենց շահերին ծառայեցնել, ինչպես արել են Ուկրաինայի, Մոլդովայի, Ռումինիայի եւ այլ դեպքերում: