Բաքուն փոխում է բնակավայրերի ռուսական անվանումները․ նոր դեմարշ Մոսկվային
Tue, 12 May 2026 16:30:13 +0400
Գաղտնիք չէ, որ վերջին շրջանում ռուս-ադրբեջանական հարաբերությունները որոշակիորեն լարված են․ Բաքուն պարբերաբար մեղադրանքներ է հնչեցնում տարբեր հարցերով ռուսական կողմի հասցեին։
Եվ ահա այս ֆոնին, Ադրբեջանի իշխանությունները հերթական որոշումն են կայացրել՝ բնակավայրերի ռուսական անվանումները փոխելու հետ կապված։
Ինչպես հայտնում են ադրբեջանական ԶԼՄ-ները, հաստատվել է Գուբայի շրջանի մի քանի գյուղերի վերանվանման մասին օրինագիծը։ Փաստաթուղթը քննարկվել է Միլլի Մեջլիսի այսօրվա նիստում և ընդունվել մեկ ընթերցմամբ։
Օրինագծի համաձայն՝ Վլադիմիրովկա գյուղը, որը համանուն գյուղական վարչատարածքային շրջանի մաս է կազմում, վերանվանվելու է Էլբիր։ Համապատասխանաբար, Վլադիմիրովկայի գյուղական շրջանը նույնպես վերանվանվելու է Էլբիրի գյուղական վարչատարածքային շրջան։
Ավելին, Ալեքսեևկա գյուղը վերանվանվելու է Չինարլի, իսկ Տիմիրյազև գյուղը՝ Բախրալի։ Հետևաբար, Ալեքսեևկայի գյուղական վարչատարածքային շրջանը նույնպես վերանվանվելու է Չինարլի։