Տավուշի մարզի Բերդ համայնքում բնակիչների հետ հանդիպման ժամանակ «Ուժեղ Հայաստան» կուսակցության խորհրդի անդամ և նախընտրական ցուցակը գլխավորող Նարեկ Կարապետյանը անդրադարձել է Ադրբեջանի նախագահի հայտարարություններին՝ նշելով, որ հարևան երկրի ղեկավարությունը խոսում է Հայաստանում բնակվելու մասին։

Նրա խոսքով՝ Ադրբեջանի նախագահ Իլհամ Ալիևը հայտարարել է, թե ադրբեջանցիները պետք է վերադառնան «պատմական հողեր» ոչ թե ռազմական ճանապարհով, այլ խաղաղ ձևով՝ ավտոմեքենաներով, և այդ գործընթացի պատասխանատվությունը դրված է պետության վրա։

Նա նաև հայտարարել է, որ իրենք պայքարում են, որպեսզի ադրբեջանցիները չբնակվեն Հայաստանի տարածքում։ Կարապետյանի կարծիքով՝ եթե գործող իշխանությունը վերարտադրվի, ապա արագորեն կփոխվի Սահմանադրությունը, ինչից հետո կարող են առաջ գալ նոր պահանջներ՝ կապված ադրբեջանցիների վերադարձի թեմայի հետ։

Ելույթի ավարտին նա ընդգծել է, որ կողմ են փոխադարձ հարգանքի վրա հիմնված հարաբերություններին, սակայն դեմ են, որ ադրբեջանցիները գան և բնակվեն Հայաստանում։