«Սիկտիր» բառը խտրականությո՞ւն է, ատելության խոսք, թե՞ թշնամանքի հրահրում
Tue, 12 May 2026 21:15:29 +0400
Շենգավիթի բնակիչ Արտակ Ավետիսյանը, որը վերջին շաբաթներին սոցիալական ցանցերում քննադատում էր իշխանություններին և անձամբ վարչապետ Նիկոլ Փաշինյանին, այսօր բերման է ենթարկվել։
Դեպքից մոտ երեք ժամ առաջ տղամարդը ֆեյսբուքյան ուղիղ եթերում դիմելով Նիկոլ Փաշինյանին ասել էր․ «Կանչում եմ հանդիպման, ինչո՞ւ ես քարոզարշավ անում, դու գործող իշխանություն ես։ Արի տես՝ քեզ ոնց ենք դիմավորում։ Կասկածում եմ, որ կգաս»։
Ավելի ուշ՝ ոստիկանները եկել են և հղի կնոջ ու տարեց տատիկի ներկայությամբ բերման ենթարկել նրան։
Արտակը նաև բերման ենթարկվելու ընթացքում վանկարկում էր՝ «Նիկոլ դավաճան» արտահայտությունը։
Սա առաջին դեպքը չէ, երբ տղամարդը հրապարակային կերպով դժգոհություն է հայտնել իշխանություններից։ Երկու շաբաթ առաջ՝ «Քաղաքացու օրվա» միջոցառումների ընթացքում, նա փորձել էր մոտենալ Արսեն Թորոսյանին։
Տեսանյութում տղամարդը ասում էր․ «Նիկոլը իրա մարդկանց օրն ա նշում, իրան պաշտողների օրն ա նշում»։ Նա նաև դժգոհում էր, որ իրեն չեն լսում և փորձում էր հեռախոսով ինչ-որ բան ցույց տալ՝ պնդելով, որ Արսեն Թորոսյանն ԱԺ ամբիոնից հայհոյում է։ Սակայն նրանց շփումը կարճ է տևել, և պաշտոնյան հեռացել է։
Ներքին գործերի նախարարությունից մեր հարցին ի պատասխան, թե ինչու է բերման ենթարկվել տղամարդը, պատասխանեցին. «Ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքի, ինչպես նաև այդ նպատակով նյութեր կամ առարկաներ տարածելու կասկածանքով 1 անձ ձերբակալվել և տեղափոխվել է Համայնքային ոստիկանության Շենգավիթի բաժին»։
Իսկ թե ինչու, ասենք, նույն Նիկոլ Փաշինյանին եւ իր թիմակիցներին բերման չեն եթարկում` երբ նրանք ընդդիմադիրների հասցեին անթույլատրելի արտահայտություններ են հնչեցնում, դա ինչու չի համապատասխանում այս հոդվածին, պարզ չէ: Մանավանդ մարդը ոչ մի ոչ ցենզուրային խոսք չի արտասանել: Ամենասուր բառը եղել է «սիկտիրը»:
Մեր տեղեկություններով` Քննչական կոմիտեն պատրաստվում է քրեական վարույթ նախաձեռնել Արտակի դեմ` ատելության խոսք տարածելու համար, ամենայն հավանականությամբ, նրան կալանքի կտանեն։