Չեմ ուզե, որ ձեր ցուցակով մարդիկ գան, հետո թռնին, նստին Նիկոլի գիրկը
Tue, 19 May 2026 19:41:11 +0400
«Հայաստան» դաշինքի հետ հանդիպման ընթացքում, այսօր գյումրեցի հայտնի ֆերմեր Գևորգ Ավագյանը, դիմելով Ռոբերտ Քոչարյանին, խոսեց այն խնդիրների մասին, որոնք այսօր հուսահատեցնում են ընտրողներին։ Ֆերմերի խոսքով, հենց «Հայաստան» դաշինքի կադրային քաղաքականությունն էր թե՛ խորհրդարանում, թե՛ տեղական մակարդակում, որ ինչ֊որ տեղ սխալ էր։
Գևորգ Ավագյանը հայտարարեց, որ ժողովուրդն այլևս հոգնել է այնպիսի գործիչներից, որոնք ընդդիմադիր թիմից հայտնվում են խորհրդարանում, իսկ հետո փոխում են իրենց ճամբարը․ «Չեմ ուզե, որ ձեր ցուցակով մարդիկ գան, լինեն Գեղամ Նազարյան, 5 տարի հետո դառնան Նազար Գեղամյան ու թռնին, նստին Նիկոլի գիրկը»։
Ավագյանի խոսքով, նույն պատկերը տիրում է նաև մարզերում, մասնավորապես Ախուրյանում, որտեղ ընդդիմության շնորհիվ պաշտոնի հասած մարդիկ այսօր արդեն ծառայում են գործող իշխանությանը․ «Էն մարդիկ, որոնց դուք նշանակել եք կամ ընտրվել են ձեր միջոցով, այսօր Նիկոլի արևով են երդվում ու բուկլետներ բաժանում։ Իրականում դրանք ՔՊ-ին ուժեղացնողներն են»։
Ելույթի վերջում գյումրեցի ֆերմերը կոչ արեց ապագայում բացառել նման «քաղաքական առևտրի» հնարավորությունը և ավելի պատասխանատու գտնվել մարդկանց ընտրության հարցում․ «Մենք պիտի հստակ հասկանանք՝ ով է գալիս, ինչի համար է գալիս, որպեսզի հետո նման դավաճանություններ ու թռիչքներ չտեսնենք։ Մեզ պետք են հաստատուն ու հավատարիմ մարդիկ, այլ ոչ թե նրանք, ովքեր առաջին իսկ հնարավորության դեպքում կանցնեն իշխանության կողմը»։