Երեկ «Լուսավոր Հայաստան» կուսակցության առաջնորդ Էդմոն Մարուքյանը հայտնեց, որ իրենց ուժի դեմ սկսել է ակտիվ հակաքարոզչություն, բայց այդ հակաքարոզչությունը իրականացնում է ԿԸՀ-ի կողմից որպես դիտորդ հավատարմագրված կազմակերպության ներկայացուցիչ Դանիել Իոաննիսյանը։ Մարուքյանը նշել էր նաև որ դիմել են ԿԸՀ, որպեսզի «Իրազեկ քաղաքացիների միավորում» հասարակական կազմակերպության դիտորդական հավատարմագիրը անվավեր ճանաչվի։

«Հրապարակ»-ին ԼՀԿ ցուցակի երրորդ համար Շուշան Ավագյանը հայտնեց․ «Կենտրոնական ընտրական հանձնաժողովը «Լուսավոր Հայաստան» կուսակցության ներկայացրած դիմում-բողոքի հիման վրա վաղը՝ ժամը 17:00-ին, հրավիրել է նիստ՝ քննարկելու «Անկախ դիտորդ» դաշինքի կազմում ընդգրկված «Իրազեկ քաղաքացիների միավորում» հասարակական կազմակերպությանը դիտորդական հավատարմագրումից զրկելու վերաբերյալ հարցը։ Լուսավոր Հայաստան կուսակցությունը դիմում-բողոքով պահանջել է քննարկել կազմակերպության ներկայացուցիչ Դանիել Իոաննիսյանի կողմից դրսևորված վարքագիծն ու հրապարակային գործունեությունը՝ որպես դիտորդական առաքելության անկողմնակալության սկզբունքի հետ անհամատեղելի»։

Նշենք, որ վերջին օրերին Դանիել Իոաննիսյանը ակտիվ կերպով ընդդիմադիր քաղաքական ուժերին է անդրադառնում, հիմնվելով «Սունկ» կայքով հրապարակված նյութի վրա։ Նա բացի ԼՀԿ-ն անդրադարձել է նաև Արման Թաթոյանին և նրա ղեկավարած կուսակցությանը, նշելով, որ պետք է բացատրեն, թե որտեղից և ով է ֆինանսավորել նախորդ տարվանից մեկնարկած իրենց քարոզարշավը։ Իոաննիսյանը կասկածի տակ էր դրել նաև «Նոր ուժ» կուսակցության կողմից արված ծախսերը, նշելով, որ Հայկ Մարությանը պետք է բացատրի, թե ով է վճարել ռուսական հետազոտական կազմակերպությանը՝ իր կուսակցության PR-ի նախապատրաստման համար։ Սակայն մեկ օր անց Իոաննիսյանը հայտարարեց, որ «Նոր Ուժ» կուսակցությունը հրավիրել էր իրենց ներկայացուցիչին, միասին ուսումնասիրել են իրենց բռենդավորման վրա աշխատած անձի համակարգիչը, որի արդյունքում պարզ է դարձել, որ բռենդավորումը չի կատարվել ոչ ռուսաստանյան, ոչ էլ ապօրինի այլ ֆինանսավորմամբ։

Ստացվում է՝ Դանիել Իոաննիսյանը ունենալով մեծ լսարան, առաջ է քաշում ու կասկածի տակ է դնում ընդդիմադիր ուժերի համբավը, այդպիսով հանրային ընկալումների վրա հնարավոր ազդեցություն ունենալով։ Իսկ նրա առաջ քաշած հարցերը, դեռ որևէ հիմնավորում չեն ունեցել, իսկ «Նոր ուժ»-ի դեպքում ճիշտ հակառակը՝ հերքվել են։