Երեք տարի կալանքի տակ մնալուց հետո Պաշտպանության բանակի նախկին հրամանատար, գեներալ-լեյտենանտ Միքայել Արզումանյանն նախորդ տարի հոկտեմբերի 28-ին դուրս եկավ բանտից՝ նրա նկատմամբ տնային կալանք սահմանեցին:

Այս որոշումը կայացրել էր գործը քննող Հակակոռուպցիոն դատարանը, տնային կալանքից բացի դատարանը կիրառել էր նաև 30 միլիոն դրամ գրավ:

Ավելի քան 7 ամիս տնային կալանքի տակ գտնվող Արզումանյանի խափանման միջոցը դատարանները հրաժարվում են փոխել: Մեր տեղեկություններով՝ պաշտպանական կողմը միջնորդություններ է ներկայացնում որևէ այլ խափանման միջոց կիրառելու մասին, որը գեներալ-լեյտենանտի ազատությունը չի սահմանափակի, սակայն դատավորները մերժում ենք դրանք։

Արզումանյանի պաշտպան Երեմ Սարգսյանին հարցրինք՝ Արզումանյանը դեռ տնային կալանք է կրու՞մ, ճի՞շտ է, որ այն փոխելու միջնորդությունները մերժվում են, կարճ պատասխանեց՝ այո, տնային կալանքում է։ Հիշեցնենք, որ Միքայել Արզումանյանը մեղադրվում է 44-օրյա պատերազմի գործերից մեկով: Նա Պաշտպանության բանակի հրամանատար նշանակվեց 2020 թվականի հոկտեմբերին, երբ պատերազմում ծանր վիրավորվել էր Արցախի պաշտպանության նախարար Ջալալ Հարությունյանը։ Պատերազմից շուրջ երկու տարի անց՝ 2022-ի սեպտեմբերին Արզումանյանը կալանավորվեց, և նրան մեղադրանք ներկայացվեց Շուշիի պաշտպանության ընթացքում անփույթ վերաբերմունք դրսևորելու համար։ Ըստ մեղադրանքի՝ այդ անփութության հետևանքով հակառակորդի զինված ուժերին հաջողվել էր ամբողջությամբ իրենց վերահսկողության տակ վերցնել Շուշի քաղաքն ու մատույցները։ Շուշիի դրվագից բացի, Միքայել Արզումանյանը մեղադրվում է նաև պատերազմի առաջին օրերին Թալիշի Արեգա բարձունքը և հարակից մարտական դիրքերն ազատագրած անձնակազմին նահանջի հրաման տալու համար։ Գեներալը մեղադրանքը չի ընդունում: Հենց Շուշիի դրվագով էլ անցել է հանցանքի վաղեմության ժամկետը: Սա նշանակում է, որ եթե անգամ դատարանն այս դրվագով նրան մեղավոր ճանաչի, գեներալը, միևնույն է, չի ազատազրկվի: