Դեպի ՌԴ ներմուծվող հայկական արտադրանքի արգելքի մասին
Wed, 03 Jun 2026 19:29:21 +0400
«Ուժեղ Հայաստան» դաշինքը, Սամվել Կարապետյանի առաջնորդությամբ, մտադիր է պահպանել և զարգացնել Ռուսաստանի հետ համագործակցությունը՝ հիմնվելով նախկինում ձեռք բերված պայմանավորվածությունների վրա։ Այս մասին լրագրողների հետ զրույցում հայտարարել է կուսակցության վարչության անդամ Նարեկ Կարապետյանը։
Նրա խոսքով՝ դաշինքը կարևորում է Ռուսաստանի հետ կառուցողական հարաբերությունների պահպանումը թե՛ տնտեսական, թե՛ անվտանգության ոլորտներում։ Կարապետյանը նշել է, որ հայ հասարակության շրջանում կան հարցեր, որոնք վերաբերում են ռուս-հայկական հարաբերություններին, և իրենք ակնկալում են դրանց պատասխանները ստանալ առաջիկայում։
Նա նաև ընդգծել է, որ հասարակությունը սպասում է այնպիսի քայլերի, որոնք կնպաստեն երկու երկրների հարաբերությունների ամրապնդմանը։ Կարապետյանի խոսքով՝ իր քաղաքական ուժը հավատարիմ է բոլոր այն միջազգային և երկկողմ պայմանավորվածություններին, որոնք Հայաստանի կողմից ստորագրվել են նախկինում, և շարունակելու է գործել այդ սկզբունքի շրջանակում։
Անդրադառնալով Ռուսաստան հայկական որոշ ապրանքների ներմուծման սահմանափակումների թեմային՝ Կարապետյանը նշել է, որ անհրաժեշտ է կանխել հարաբերությունների սրացումը և պահպանել երկու երկրների միջև ձևավորված առևտրատնտեսական կապերը։
Նրա գնահատմամբ՝ Հայաստանը փոքր պետություն է և չպետք է ներգրավվի խոշոր աշխարհաքաղաքական բևեռների դիմակայությունների մեջ, այլ պետք է առաջնորդվի սեփական ազգային և պետական շահերով։