Սյունիքի ՔՊ-ականները Գորիսում տնօրենների հավաք են արել
Thu, 04 Jun 2026 15:15:54 +0400
Մեր տեղեկություններով՝ Սյունիքի մարզպետ Ռոբերտ Ղուկասյանը եւ ՔՊ-ական պատգամավոր Արմեն Խաչատրյանը Գորիս քաղաքում գտնվող Գորիս hյուրանոցում հավաքել են քաղաքի բոլոր ուսումնական հաստատությունների՝ մանկապարտեզների, դպրոցների, քոլեջների տնօրեններին: Մեզ պատմեցին, որ մարզպետը սկսել է ինքն իրեն գովելուց, ներկայացրել է իր աշխատած տարիներին Սյունիքի մարզում կատարված աշխատանքները:
Ներկայացրել է, որ սահմանին ամրաշինական աշխատանքներ են իրականացվում, իսկ հանդիպման վերջում ներկաներին հորդորել է, որ ընտրություններին քվեարկեն համար 16-ի օգտին: Փորձեցինք մի քանի դպրոցների տնօրեններից ճշտել՝ արդյո՞ք նրանց հրահանգել են վաղը մասնակցել ՔՊ-ի հանրահավաքին եւ ընտրել ՔՊ-ի օգտին: Գորիսի Յուրի Բախշյանի անվան թիվ 3 հիմնական դպրոցի տնօրեն Սերգեյ Ավանեսյանը, ով մոլի ՔՊ-ական է, մեր հարցը լսելով, ասաց, որ նպատակահարմար չի գտել՝ չի գնացել մարզպետի հրավիրած հավաքին: Գորիսի Ակսել Բակունցի անվան թիվ 1 ավագ դպրոցի տնօրենի ժամանակավոր պաշտոնակատար Մարիետա Միրաքյանը, մեզ հետ զրույցում ասաց, որ հանդիպմանը կրթական ոլորտի հարցեր չեն քննարկվել, միայն խոսվել է Գորիսում մարզպետարանի կատարած աշխատանքների մասին, կարելի է ասել՝ մարզպետի հաշվետվությունն է եղել: Հարցին՝ Ձեզ հորդորե՞լ են վաղը գնալ ՔՊ-ի հանրահավաքին, ասաց. «Չէ, նման բան չի եղել, ես վաղը աշխատանքի են՝ մեր դպրոցում քննություն է»: