Հանրային Հեռուստաընկերության եթերում երեկ թեժ բանավեճից հետո այսօր աղմկահարույց ձերբակալություններ են տեղի ունենում՝ ձերբակալվել են քաղաքական գործիչներ Արմեն Աշոտյանը, Արման Սահակյանը, Գագիկ Բեգլարյանը, Գագիկ Խաչատրյանն ու նրա որդին՝ Արտյոմ Խաչատրյանը: Խուզարկություն է իրականացվել «Արմատմեդիա» ընկերության գրասենյակում:
Քաղաքագետներն ու քաղտեխնոլոգները շեշտում են՝ Նիկոլ Փաշինյանի չընտրվելու վախերն են ստիպում նրան գնալ նման քայլերի։ Եւ «Հանրապետություն» կուսակցության ղեկավար Արամ Սարգսյանն էլ նրա ուղիղ հրահանգով է դիմել ԿԸՀ` «Ուժեղ Հայաստանի»` ընտրություններին մասնակցելու հնարավորությունից զրկելու համար։ Հիշեցնենք, որ Փաշինյանը երեկ բանավեճի ժամանակ այդ մասին «խնդրեց» Արամ Սարգսյանին և Գուրգեն Սիմոնյանին։

Զրուցեցինք փաստաբան Երվանդ Վարոսյանի հետ։

– Իրավական ձևակերպում հնարավո՞ր է տալ Փաշինյանի գործողություններին։

-Ոչ, չի կարելի տալ իրավական գնահատական, որովհետև այս ամեն ինչը իրավական ոչ մի սահմանների մեջ շատ վաղուց չի տեղավորվում։ Ցավոք սրտի, զարմանալի ոչինչ տեղի չի ունենում, Նիկոլ Փաշինյանն, ինչպես ակնհայտ է, ամեն ինչ անելու է իշխանությունը պահելու համար։ Վերարտադրվել բառը չեմ օգտագործում, որովհետև այս պարագայում դա վերարտադրվել չի՝ դա իշխանություն պահել է։ Եթե նրանք գնան անգամ այն քայլին, որ ընդդիմադիր գլխավոր ուժերից մեկին ընտրապայքարից հանեն, ապա ընդհանրապես ընտրությունը, որպես այդպիսին, իմաստազրկվում է և ընտրությունների արդյունքում, եթե ինչ-որ ձևակերպումներով «Քաղաքացիական պայմանագիրը» շարունակի լինել իշխող ուժ, ապա նա չի լինելու օրինական իշխող ուժ։

-Ունենալու ենք օկուպացվա՞ծ իշխանություն։

-Ինչ բառ ուզենք կարող ենք կիրառել՝ իշխանության ուզուրպացիայի հետ գործ կունենանք։ Նույն հաջողությամբ կարելի է ոչ մի ուժի չգրանցել, գրանցել միայն «Քաղաքացիական պայմանագրին», ասեմ ավելին, կարելի է ընտրատեղամասերի առաջ ոստիկանների կանգնեցնել և թույլ տալ ընտրատեղամաս մտնել միայն Նիկոլ Փաշինյանի ընտրողներին։ Այստեղ կարևորն այն է, որ Եվրոպական Միությունը դա կողջունի։

-Այսինքն, այն, ինչ անում է Նիկոլ Փաշինյանը, ուղիղ համարժեք է Ձեր բերած օրինակներին, եթե դրանք կյանքի կոչվեն։

-Այո, էապես ոչ մի տարբերություն չկա։

-Փաշինյանի այս գործողությունները պայմանավորված են այն փաստի գիտակցմամբ, որ ընտրություններում չի՞ հաղթելու։

-Եթե, օրինակ, «Ուժեղ Հայաստան» կուսակցությանը ընտրապայքարից հանեն․․․դա նշանակում է, որ Նիկոլ Փաշինյանին հստակ զեկուցել են, որ ինքը չի վերընտրվելու։ Այլ պարագայում ինքն, իհարկե, դրան չի գնա։

– Ինչո՞ւ եք այդպես կարծում։

-Եթե իրավիճակը, ըստ իր ունեցած տեղեկությունների այլ է։ Ասեմ ինչու․ Նիկոլ Փաշինյանն անկախ ամեն ինչից խելք ունի և նա շատ լավ հասկանում է, թե ինչ է՝ լինել ոչ լեգիտիմ իշխանություն այս ծանր ժամանակաշրջանում՝ տուրբուլենտություններով լի։ Նա այդ բացահայտ քայլին կգնա միայն որպես վերջին տարբերակ։

– Այդ դեպքում այս քայլերի նպատակը ո՞րն է։

– Դա ես չգիտեմ, իրավաբանը չի կարող դա մեկնաբանել։

– Իսկ իր գործողությունները իրավաբանական ո՞ր բնորոշման կամ դասակարգման մեջ են տեղավորվում։

– Կարելի է Քրեական օրենսգիրքը բացել, մի հատ առջևից թերթել, մի հատ էլ հետևից թերթել դեպի առաջ։

– Այսինքն, մի ամբողջ փունջ կձևավորվի՞։

– Այո, կարելի է անվերջ թերթել։