Կրեմլը չէր ձգտում ՀՀ-ում ձևավորել այն արդյունքը, որը կցանկանար ընտրություններում․ Ստանկևիչ
Thu, 11 Jun 2026 10:30:45 +0400
Ռուս քաղաքագետ և պետական գործիչ Սերգեյ Ստանկևիչը հարցին, թե ինչպես են Ռուսաստանում գնահատում Հայաստանի ընտրությունների արդյունքները, պատասխանել է․
«Կրեմլը չէր ձգտում օգտագործել իր ազդեցության բոլոր լծակները և ձևավորել այն արդյունքը, որը Մոսկվան «ցանկանում» էր Հայաստանի ընտրություններում։ Պարտադրանքները երբեք երկարատև չեն։
Հայաստանի դեպքում Մոսկվան շահագրգռված էր, որ հայ քաղաքացիները կատարեն իրենց սեփական պատասխանատու ընտրությունը՝ ցանկալի է ոչ թե չորս տարի, այլ առջևում գտնվող մի ամբողջ դարաշրջանի համար։ Եվ նրանք բոլոր հետևանքները կվերագրեին իրենց, այլ ոչ թե իրենց չափազանց կպչուն և «մշտապես ամեն ինչի մեջ մեղավոր» հարևանին։
Արդյունքը հայտնի է. Փաշինյանի «Քաղաքացիական պայմանագիր» կուսակցությունը ստացել է ձայների մի փոքր պակաս, քան 50%-ը, բայց այն մեծամասնություն կստանա խորհրդարանում և կհավակնի վարչապետի աթոռին։ Ընդհանուր գնահատականն այն է, որ այս ընտրությունը կարևորագույն չէ. պատմական շրջադարձ տեղի չի ունեցել։
Կյանքը՝ իր խաչմերուկում պարով, կարող է շարունակվել ևս մի քանի տարի։
Հաջորդ մի քանի տարիների ընթացքում Հայաստանի քաղաքացիները պետք է գնահատեն Ռուսաստանի հետ խզման իմաստը և Էմանուել Մակրոնի և Ուրսուլա ֆոն դեր Լեյենի հետ բարեկամության օգուտները»։
Դիտարկմանը, թե ինչ քայլեր կձեռնարկի Ռուսաստանը Փաշինյանի կուսակցության հաղթանակին ի պատասխան, քաղաքագետը նշել է, որ տնտրությունները չճանաչելու բազմաթիվ պատճառներ կային. լայնածավալ ընթացակարգային խախտումները և ընդդիմության վրա անօրինական ճնշումը ավելի քան ակնհայտ են։
«Սակայն Մոսկվան ընտրությունների արդյունքները ընդունեց առանց շնորհավորանքների։ Եվ նա կսպասի հաղթողի ժամանմանը՝ լուրջ անձնական զրույցի համար՝ առանց «ռազմավարական երկիմաստությունների»։ Նրան անկեղծորեն կներկայացվի Մոսկվայի հնարավոր գործողությունների ամբողջ շրջանակը, եթե Փաշինյանը շարունակի իր ներկայիս քողարկման ռազմավարությունը՝ «օգտագործելով Ռուսաստանը որքան հնարավոր է երկար, աստիճանաբար շարժվելով դեպի Արևմուտք»։ Սա պարզապես «շուկայական հարաբերություններին անցնելու» հարց չի լինի, այլ տնտեսական համագործակցության զարգացման կամ լիակատար դադարեցման՝ երկու կենսունակ տարբերակ»,-նշել է Ստանկևիչը։
Նրա պնդմամբ, առանձին թեմա կլինի Հարավային Կովկասում արտատարածաշրջանային տերությունների կողմից ցանկացած ռազմատեխնիկական ներկայության վերաբերյալ նախազգուշացնող քննարկումը։ Մոսկվայի արձագանքն այստեղ, հավանաբար, կգերազանցի տնտեսական նկատառումները, չնայած մանրամասները քննարկելը վաղաժամ է, նկատել է քաղաքագետը։