Իրանի «նվերը» Թրամփի 80-ամյակին
Mon, 15 Jun 2026 13:00:18 +0400
Իրանը դիտավորյալ սպասել է մինչև կեսգիշեր՝ խաղաղության համաձայնագիրը վերջնականապես կնքելու համար, քանի որ չէր ցանկանում, որ այն համընկնի ԱՄՆ նախագահ Դոնալդ Թրամփի ծննդյան օրվա հետ, հաղորդում է The New York Times (NYT)-ը՝ հղում անելով երկու իրանցի պաշտոնյաների։
Հոդվածում նշվում է, որ 7.5 ժամվա տարբերությունը թույլ է տվել Թեհրանին և Վաշինգտոնին տարբերվել խաղաղության համաձայնագրի ստորագրման ժամկետի վերաբերյալ իրենց հայտարարություններում։
Հունիսի 13-ին ԱՄՆ նախագահը իր TruthSocial սոցիալական ցանցի էջում հայտարարել է, որ Իրանի հետ խաղաղության համաձայնագիրը կստորագրվի կիրակի՝ հունիսի 14-ին։
Ավելի ուշ իրանական Fars լրատվական գործակալությունը, հղում անելով բանակցային թիմին մոտ կանգնած աղբյուրին, հաղորդել է, որ Իրանը պատրաստ չէ ԱՄՆ-ի հետ խաղաղության համաձայնագիր ստորագրել Վաշինգտոնի կողմից սահմանված ժամկետում։
«Նույնիսկ եթե Իրանի բոլոր առաջարկները կատարվեն, Թրամփի կողմից հայտարարված ժամկետում որևէ համաձայնագիր անպայման չի ստորագրվի», – ասել է աղբյուրը։
Ավելի վաղ գրել ենք, որ այյսօր ԱՄՆ-ն և Իրանը խաղաղության համաձայնագիր են ստորագրել։ Տեղեկատվությունը հաստատել են ԱՄՆ նախագահ Դոնալդ Թրամփը, Պակիստանի վարչապետ Շահբազ Շարիֆը և Իրանի փոխարտգործնախարար Քազեմ Ղարիբաբադին։ Ստորագրման պաշտոնական արարողությունը տեղի կունենա ուրբաթ՝ հունիսի 19-ին։
Այնուամենայնիվ, Իրանը որևէ ֆինանսավորում չի ստանա մինչև իր պարտավորությունները չկատարի, հաղորդում է Axios-ը՝ հղում անելով աղբյուրին։
ԱՄՆ բարձրաստիճան պաշտոնյան հերքել է Իրանի պնդումը, որ Թեհրանը 60-օրյա բանակցությունների մեկնարկից առաջ առանց որևէ պայմանի կստանա 12 միլիարդ դոլարի սառեցված ակտիվներ՝ դա անվանելով «փաստերի խեղաթյուրում», գրում է Axios-ի լրագրող Բարաք Ռավիդը։