«Հրապարակ». Այդ նամակն արտացոլում է մեր երկրի խաղաղության ձգտումը
Tue, 16 Jun 2026 12:15:04 +0400
«Հրապարակը» զրուցել է Ուկրաինայի նախագահին առընթեր Ռազմավարական հետազոտությունների ազգային ինստիտուտի (ՌՀԱԻ) փոխտնօրեն, արտաքին հետազոտությունների կենտրոնի ղեկավար Մաքսիմ Պալամարչուկի հետ։
– Զելենսկու բաց նամակը՝ ուղղված Պուտինին, մեծ իրարանցում է առաջացրել։ Ուկրաինայի նախագահն առաջարկել է ՌԴ առաջնորդին՝ դեմառդեմ հանդիպել՝ պատերազմին վերջ տալու համար։ Նշել է, որ պատերազմի գինը կարող է բարձրանալ Ռուսաստանի համար՝ նկատի ունենալով այդ երկրի շարունակական եւ հատկապես մարդկային կորուստները։ Նաեւ առաջարկել է՝ կրակը դադարեցնել շփման գծում։ Ինչո՞ւ հիմա, եթե վստահ է, որ Ուկրաինան հաջողություններ ունի մարտադաշտում։
– Ուկրաինայի նախագահի նամակի հրապարակումն արտացոլում է մեր երկրի խաղաղության ձգտումը: Ռազմաճակատում իրավիճակի բարելավումը եւ Ռուսաստանի տարածքի խորքում գտնվող թիրախների դեմ հարվածների ինտենսիվացումը չեն նշանակում, որ Ուկրաինան բարձր գին չի վճարում շարունակվող ռազմական գործողությունների համար: Հաշվի առնելով, որ հակամարտության զուտ ռազմական լուծման հավանականությունը փոքր է, պատերազմի երկարաձգումը քիչ ռազմավարական իմաստ ունի: Միեւնույն ժամանակ, Ռուսաստանի նախագահի արձագանքը ցույց տվեց նրա՝ պատերազմը դադարեցնելու անպատրաստ լինելը։
– Նաեւ հանդիպմա՞նը պատրաստ չլինելը։ Պուտինն ասաց, որ իմաստ չի տեսնում այս պահին՝ հանդիպել Զելենսկու հետ, տարակուսանք է հայտնել, թե ինչու է Ուկրաինայի առաջնորդը կամենում ԱՄՆ-ին զրկել Կիեւի համար կարեւոր համաձայնագրերի երաշխավոր լինելու իրավունքից։ Իրո՞ք Զելենսկին նման ցանկություն ունի, մանավանդ որ վերոնշյալ նամակում նա ակնարկել է Թրամփի վարչակազմի կողմից Իրանի պատճառով Ուկրաինայում պատերազմը երկրորդ պլան մղելու մասին։
– Հաշվի առնելով Պուտինի՝ պատերազմը դադարեցնելու անպատրաստ լինելը, նրա հայտարարությունները նպատակ ունեն շեղել ուշադրությունն այս հիմնական հարցից եւ լարվածություն առաջացնել Ուկրաինայի եւ Միացյալ Նահանգների միջեւ: Ուկրաինան հետաքրքրված է ԱՄՆ-ի՝ ռազմական գործողությունները դադարեցնելու ջանքերով եւ Ամերիկայի՝ որպես ձեռք բերված պայմանավորվածությունների երաշխավորի դերով։
– Բայց չէ՞ որ Թրամփը հայտարարեց, որ Մոսկվան եւ Կիեւն ինքնուրույնաբար լուծեն խնդիրները՝ ըստ էության դեմ չլինելով աստիճանաբար նվազեցնել ԱՄՆ-ի միջնորդական դերը։ Արդյո՞ք այս ամենը պատերազմի նոր ու ավելի դաժան փուլի մասին չի վկայում, հատկապես, երբ կողմերը հայտարարում են իրենց հաջողությունների մասին։ Ո՞րն է ելքը, հեռանկարը։
– ԱՄՆ նախագահի հայտարարությունը պետք է դիտարկել ներքաղաքական գործընթացների համատեքստում: Նա ընդլայնում է իր մանեւրելու տարածքը՝ խուսափելու ընդդիմության կողմից ռազմական գործողությունների շարունակման դեպքում ձախողման մեղադրանքներից: Եթե համաձայնություններ ձեռք բերվեն, ԱՄՆ նախագահն ակտիվորեն կմիանա գործընթացին: