Պատրա՞ստ է հայտարարելու, որ Տիգրանաշենը չի հանձնելու
Tue, 23 Jun 2026 13:21:06 +0400
Լրագրողների հետ զրույցում ՀՅԴ ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը կոշտ գնահատականներ հնչեցրեց երկրի քաղաքական իրավիճակի վերաբերյալ՝ անդրադառնալով գործող իշխանությանը և վարչապետ Նիկոլ Փաշինյանին։
Նրա խոսքով՝ գործող իշխանությունը չունի ոչ միայն սահմանադրական մեծամասնություն, այլև, իր գնահատմամբ, չունի հասարակական լայն լեգիտիմություն։ Սաղաթելյանը պնդեց, որ իշխանությունը չի ստացել ժողովրդի մեծամասնության աջակցությունը և փորձում է պահպանել դիրքերը ճնշումների ու վարչական մեթոդների միջոցով։
Նա նշեց, որ, իր կարծիքով, ընտրական գործընթացների ընթացքում եղել են խախտումներ, ճնշումներ և պետական ռեսուրսների չարաշահում, սակայն նույնիսկ այդ պայմաններում իշխանությանը չի հաջողվել ապահովել բավարար արդյունք՝ իր քաղաքական օրակարգը լիարժեք իրականացնելու համար։
Սաղաթելյանը նաև ընդգծեց, որ իշխանությունը, ըստ նրա, փորձում է ամրապնդել դիրքերը՝ գնալով ներքաղաքական սրման ճանապարհով, սակայն այդ գործընթացը, իր ձևակերպմամբ, ժամանակավոր է և ունի սահմանափակ հետևանքներ։
Խոսելով անվտանգության և տարածաշրջանային իրավիճակի մասին՝ նա պնդեց, որ երկրի առաջ կանգնած են լուրջ մարտահրավերներ, այդ թվում՝ սահմանային խնդիրներ և անվտանգային ռիսկեր, որոնք, նրա գնահատմամբ, կարող են խորանալ առաջիկայում։
«Այս շոուներն անելու փոխարեն Փաշինյանը պետք է պատասախանի հետևյալ հարցին՝ պատրա՞ստ է հայտարարել, որ Տիգրանաշենը չի հանձնելու, Հայաստանից նոր տարածքներ չի հանձնելու։ Թող այդ հարցին պատասխանի»,- ասել է նա: