Արդեն ճանապարհին մտածում էի` այսօր մի բան անելու են
Thu, 25 Jun 2026 16:30:14 +0400
Գյումրու ավագանու «Մայր Հայաստան» խմբակցության ղեկավար Կարեն Սիմոնյանը լրագրողների հետ զրույցում անդրադարձավ այսօր իր բնակարանում իրականացված խուզարկությանը՝ այն կապելով նաև ավագանու նիստի հետ։
«Ես արդեն գնում էի ավագանու նիստին մասնակցելու, երբ մարզպետարանի հարակից հատվածում իրավապահները կանգնեցրին ինձ։ Փաստացի այլընտրանք չթողեցին և ուղեկցեցին տուն, որտեղ էլ իրականացվեց խուզարկությունը։ Ճանապարհին արդեն հասկանում էի, որ այսօր ինչ-որ գործողություն էին նախապատրաստել իմ նկատմամբ»,- ասաց Սիմոնյանը։
Նրա խոսքով՝ նիստի համար նախապես ելույթ էր պատրաստել, որտեղ մտադիր էր խոսել իշխանությունների կողմից իրականացվող քաղաքական ճնշումների մասին, այդ թվում՝ իր նկատմամբ վերջին շրջանում տեղի ունեցած գործողությունների վերաբերյալ։
«6 տարբեր ձայնագրություն են հրապարակել, որոնցից միայն մեկի վերջում մեր խմբակցության անդամ Հասմիկ Սահրադյանը տալիս է անունս, ասում է` պատասխանատուների հետ պիտի աշխատանքը հարմարեցնենք։ Սա դարձրել են իրենց հիմք»,-նշեց Սիմոնյանը։
«Առգրավեցին ընտանիքի անդամների հեռախոսները, ուսումնասիրեցին դրանք, անգամ կնոջս ու երեխաների, իրենց ասացի` դա հայ տղամարդուն վայել չէ։ Այնուամենայնիվ, այդ ամենի հետևանքով ես զրկվեցի ավագանու նիստին մասնակցելու հնարավորությունից»,- ասաց Սիմոնյանը։
Նրա խոսքով՝ ակնհայտ է, որ տեղի ունեցածն ուղղակիորեն կապված էր նիստի հետ։ Արդյունքում Սիմոնյանը նաև տարակուսանք հայտնեց իրավապահների գործողությունների առնչությամբ. «Չգիտեմ՝ ինչից էին այդքան անհանգստացած կամ ինչ էին փնտրում։ Մտնում են տուն, խուզարկություն են իրականացնում, առգրավում տեխնիկան, բայց որևէ արդյունք չեն արձանագրում»։