«Հրապարակ»․ Փաշինյանին պետք են մարդիկ, ովքեր իրենից ավելի Նիկոլ են
Wed, 01 Jul 2026 10:15:38 +0400
Երկուշաբթի օրը պարզ դարձավ, որ ՔՊ-ն ԱԺ նախագահի տեղակալի թեկնածուներ է ընտրել Հայկ Կոնջորյանին եւ Վահագն Ալեքսանյանին։ Այդ մասին «Քաղաքացիական պայմանագիր» կուսակցության վարչության նիստից դուրս գալուց հետո` նույն օրը հայտարարեց Նիկոլ Փաշինյանը։ Լրագրողների հարցին, թե ինչու ԱԺ նախագահի տեղակալի պաշտոնում կուսակցությունը կին թեկնածու չի առաջադրել, Փաշինյանն ասաց, որ ընտրությունն անցկացվել է փակ, գաղտնի քվեարկությամբ։
«Մեզ մոտ փակ, գաղտնի քվեարկություն է եղել, չեմ կարող ասել։ Բայց այդ խնդիրը չենք տեսնում։ Երբ ասում ենք՝ պետք է հավասարություն լինի, նշանակում է, որ պետք է լինեն հավասար մրցակցային պայմաններ»,- նշել է Փաշինյանը: Նրա խոսքով՝ քննարկվել է նաեւ կանանց համար առանձին քվոտա սահմանելու հարցը, սակայն որոշվել է դա չանել։ «Քննարկվել է՝ արդյոք պե՞տք է քվոտա սահմանենք, որ անպայման մեկ կին եւ մեկ տղամարդ ընտրվեն։ Որոշվել է, որ քվոտա չսահմանենք եւ քվեարկությունն ազատ թողնենք»,- ասել է նա։ Անդրադառնալով ՔՊ խմբակցության ղեկավարի ընտրությանը՝ Փաշինյանը նշել է, որ այդ հարցով դեռ որոշում չկա։ Հիշեցնենք, որ ՔՊ կուսակցության վարչության նիստում հունիսի 25-ին փակ, գաղտնի քվեարկության արդյունքում ԱԺ նախագահի թեկնածու էր ընտրվել Ռուբեն Ռուբինյանը: Առաջին պլան բերված ՔՊ-ականներից մի բան է պարզ դառնում, որ Նիկոլ Փաշինյանը մարդկանց առաջ քաշելու կարեւոր նախապայման է համարում հայհոյախոս, անդաստիարակ, անմակարդակ, ագրեսիվ, չար ու անգրագետ լինելը:
Արդյունքում` Ազգային ժողովը տարեցտարի գահավիժում է: Ամեն անգամ թվում է, որ սրանից ավելի վատ կազմ դժվար է պատկերացնել, բայց արի ու տես, որ ամեն անգամ Նիկոլ Փաշինյանը «զարմացնում է»:
Նախկին ՔՊ-ական Հակոբ Ասլանյանը, մեզ հետ զրույցում անդրադառնալով առաջին պլան բերված ՔՊ-ականների կեցվածքին եւ արժանիքներին, ասում է. «Պետք է արձանագրել, որ Նիկոլ Փաշինյանին պետք են մարդիկ, ովքեր իրենից ավելի Նիկոլ են: Բնական է, որ գնալով ԱԺ-ի որակը պետք է ընկներ: Ինչո՞ւ․ որովհետեւ ընտրությունները ցույց տվեցին, որ Նիկոլ Փաշինյանը որակազրկվել է, իսկ որակազրկված հրամանատարն իրենից ավելի որակազրկված մասսային պետք է առաջին պլան բերի: ՔՊ-ում մատների վրա կարելի է հաշվել խելոք մարդկանց: Եթե ընդդիմությունը մանդատները չվերցնի, ապա շատ կարճ ժամանակ անց ՔՊ-ական Ազգային ժողովը հանրության առաջ լրիվ մերկ կներկայանա: Նախորդ ԱԺ-ի պատկերն էլ գրեթե նույնն էր, սակայն հիմա որակն ավելի է ընկել, որովհետեւ Ազգային ժողովը «բեսեդկայի» տրամաբանությունից դուրս չի եկել: Նույն Վահագն Ալեքսանյանը եւ մյուսները եթե դադարեն նախկինների վրա ցեխ շպրտել, մեղադրել բոլորին եւ այլն, ապա մարդիկ հանկարծ կնկատեն, որ նրանց խոսքում չկա բացարձակապես որեւէ միտք: Նրանցից շատերը չեն պատկերացնում, թե ինչի համար է Ազգային ժողովը: Եթե Նիկոլը թույլ չի տալիս, որ ԲՀԿ-ն մտնի խորհրդարան, ապա ՔՊ-ականներին մերկացնելու մեկ տարբերակ կա` ընդդիմությունը պետք է մանդատներից հրաժարվի: Սրանք ո՛չ քաղաքական գործիչներ են, ո՛չ էլ պրոֆեսիոնալներ են»: