Ընտրությունները չեն համապատասխանել Սահմանադրության պահանջներին
Wed, 01 Jul 2026 11:51:22 +0400
Սահմանադրական դատարանում ընտրությունների արդյունքների վիճարկման գործով քննությունը հասել է եզրափակիչ փուլին, և կողմերը ներկայացնում են իրենց վերջնական ելույթները։
«Ուժեղ Հայաստան» դաշինքի ներկայացուցիչ, փաստաբան Արամ Վարդևանյանը իր ելույթում նշել է, որ իրենց գնահատմամբ՝ ընտրությունները չեն համապատասխանել Սահմանադրության 7-րդ հոդվածի պահանջներին և չեն եղել ազատ ու հավասար։
Նրա խոսքով՝ դատավարության ընթացքում ներկայացվել են փաստարկներ, որոնք, ըստ իրենց, վկայում են ատելության խոսքի լայն տարածման, ինչպես նաև վարչական ռեսուրսի լայնածավալ չարաշահման մասին։
Վարդևանյանը նաև անդրադարձել է «Ուժեղ Հայաստան» դաշինքի գործունեությանը վերաբերող հարցերին՝ նշելով, որ ապրիլի 7-ին Ընտրական օրենսգրքում կատարված փոփոխությունների հետևանքով, իր պնդմամբ, սահմանափակվել է Սամվել Կարապետյանի անվան օգտագործման հնարավորությունը։ Նա նաև ընդգծել է, որ ընտրական ամբողջ գործընթացի ընթացքում Կարապետյանը գտնվել է տնային կալանքի տակ։
Հիշեցնենք, որ Սահմանադրական դատարանն այսօր ավարտելու է գործի հրապարակային քննությունը և հեռանալու է խորհրդակցական սենյակ՝ որոշում կայացնելու համար։