«Հրապարակը» զրուցել է Ուկրաինայի նախագահին առընթեր Ռազմավարական հետազոտությունների ազգային ինստիտուտի (ՌՀԱԻ) փոխտնօրեն, արտաքին հետազոտությունների կենտրոնի ղեկավար Մաքսիմ Պալամարչուկի հետ։

– Վոլոդիմիր Զելենսկին հայ­տարարել է, որ հաստատել է Ռուսաստանի դեմ 40-օրյա հատուկ գործողությունը։ Նա նշել է, որ հատուկ օպերացիայի նպատակն է՝ ՌԴ-ին ստիպել դադարեցնել պատերազմը։ Եթե առավել մանրամասն՝ ի՞նչ է ենթադրում այս պլանը, ե՞րբ է մեկնարկելու այն։

– Նախագահ Զելենսկին տվյալ գործողության մեկնարկի մասին հայտարարեց հունիսի 25-ին՝ Ուկրաինայի անվտանգության ծառայության ղեկավարի պաշտոնակատարի հետ հանդիպման ժամանակ։ Սակայն օպերացիայի շրջանակում գործողություններն ինքնին գաղտնի են։

– Այս ամենին զուգահեռ, միայն հուլիսին Ռուսաստանը երկու զանգվածային հարձակում է իրականացրել Ուկրաինայի մայրաքաղաքի ու հարակից շրջանների վրա, որի հետեւանքով բազմաթիվ զոհեր եւ վիրավորներ կան։ Կիեւում ինչպիսի՞ն է հիմա վիճակը։ Այս պահին կարծես պատերազմի թեժ կետերը Կիեւն ու Կոստանտինովկա՞ն են։

– Կիեւում կան բազմաթիվ տուժածներ. հրթիռային հարվածը լուրջ վնաս է հասցրել բնակելի շենքերին։ Սակայն սա առաջին օդային հարվածը չէ։ Քաղաքը հարմարվել է, եւ բնակիչները որքան հնարավոր է՝ շարունակում են իրենց առօրյա գործունեությունը։ Սակայն իրավիճակն առաջնագծում եւ սահմանամերձ քաղաքներում ծանր է։ Սումիում, Զապորոժիեում եւ Խերսոնում հակառակորդն ահաբեկում է խաղաղ բնակիչներին ԱԹՍ-ների հարվածներով, հրետանային կրակով եւ ավիառումբերով։ Առաջնագծում մարտերը շարունակվում են նաեւ Կոստանտինովկայից շատ ավելի հեռու, չնայած պարզ է, որ ռուսական զորքերը հատկապես այնտեղ են կենտրոնացած։

– Ուկրաինայի ԱԳ նախարար Անդրեյ Սիբիգան հայտնել է, որ հուլիսին Կիեւի վրա երկու լայնածավալ հարձակումներից հետո Ուկրաինան ՄԱԿ-ի ԱԽ արտակարգ նիստ է խնդրել՝ ակնկալելով սկզբունքային ու ուժեղ արձագանք՝ պատերազմը դադարեցնելու եւ երկարատեւ խաղաղության հասնելու համար։ Կկարողանա՞ միջազգային հանրությունը գոնե այս անգամ առավել վճռական ու էֆեկտիվ լինել՝ 4 տարուց ավելի շարունակվող արյունահեղությանը վերջ տալու համար։

– Կցանկանայի նման հույս ունենալ, բայց ՄԱԿ-ի Անվտանգության խորհրդում վետոյի մեխանիզմը դժվար թե թույլ տա նման սցենարը հավանական համարել։

– Պատերազմը կանգնեցնելու անհրաժեշտության մասին շարունակում է խոսել նաեւ ԱՄՆ նախագահ Թրամփը․ այս օրերին Անկարայում ՆԱՏՕ-ի գագաթնաժողովի շրջանակում մտադիր է հանդիպել Զելենսկու հետ, ապա նույն թեմայով զրուցել Պուտինի հետ։ Խաղաղության հասնելու տեսակետից, ըստ պաշտոնական Կիեւի, ո՞ր ուժային կենտրոնն է առավել հուսալի այս պահին։

– Իրանի հետ հակամարտության աստիճանական ավարտը հույս է ներշնչում ԱՄՆ խաղաղապահ ջանքերի ակտիվացման համար։ Ուկրաինան հետեւողականորեն համագործակցում է բոլոր ազդեցիկ երկրների հետ՝ խաղաղության հասնելու համար։ Եթե նրանց դիրքորոշումները մերձենան, ռազմական գործողությունների դադարեցումը, հավանաբար, ավելի շուտ կգա։