«Վարկերը ո՞վ է վճարելու»
Thu, 09 Jul 2026 12:42:48 +0400
«Արարատցեմենտ» գործարանի աշխատակիցները շարունակում են իրենց բողոքի ակցիան՝ պահանջելով հնարավորինս արագ վերականգնել ձեռնարկության բնականոն գործունեությունը։ Նրանք նշում են, որ արտադրության կանգը լուրջ սոցիալական և ֆինանսական խնդիրներ է առաջացնում հարյուրավոր աշխատակիցների համար։
Գործարանի հումքի նախապատրաստման արտադրամասի հերթափոխի պետ Արայիկ Ավդալյանի խոսքով՝ ստեղծված իրավիճակը ծանր ազդեցություն կունենա աշխատակիցների կյանքի վրա։ Նա ընդգծել է, որ գործարանի աշխատանքի դադարեցման հետևանքով մարդիկ զրկվում են իրենց հիմնական եկամտից, ինչը կարող է հանգեցնել ֆինանսական լուրջ դժվարությունների։
Ավդալյանը նաև տարակուսանք է հայտնել այն հանգամանքի վերաբերյալ, որ ձեռնարկության գործունեությունը ամբողջությամբ դադարեցվել է։ Նրա խոսքով՝ նույնիսկ եթե քննարկվում են սեփականության կամ կառավարման հետ կապված փոփոխություններ, դա չպետք է հանգեցնի արտադրության կանգին, քանի որ դրա հետևանքները կրում են առաջին հերթին աշխատակիցներն ու նրանց ընտանիքները։
Նրա խոսքով՝ գործարանի բազմաթիվ աշխատակիցներ վարձատրվում են ըստ աշխատանքի ծավալի, ուստի պարապուրդի յուրաքանչյուր օրը նրանց զրկում է եկամտից։ Միաժամանակ շատերը շարունակում են կրել վարկային և հիփոթեքային պարտավորություններ, որոնց կատարումը վտանգվում է աշխատանքի բացակայության պայմաններում։