Մինչ այս օրերին տնտեսվարողներն ու գյուղացիներն իրենց բերքի ու արտադրանքի ձեռքը կրակն են ընկել՝ չեն կարողանում արտահանել եւ իրացնել, եւ իշխանությունն արագ տեմպերով քաղաքական հաշվեհարդար է տեսնում գործարար Գագիկ Ծառուկյանի նկատմամբ՝ փակելով նրա գործարաններն ու հազարավոր աշխատողների զրկելով եկամտի աղբյուրից, նույն տեմպերով իշխանության սրտի օլիգարխ Նարեկ Նալբանդյանն ընդլայնում է իր բիզնեսն ու գրոհում եվրոպական շուկան: Նրա հյուրանոցային բիզնեսը, խմիչքների եւ ձվի արտադրությունը սրընթաց վերելք են ապրում: «By Nalbandyan ապրանքանիշի ջրի, օղու եւ ոչ ալկոհոլային ըմպելիքների գործարանը շարունակում է ընդլայնել իր արտադրական հզորությունները՝ միջազգային շուկաներում աճող պահանջարկը բավարարելու նպատակով։ Գործարանում ներդրվել են նոր, ժամանակակից արտադրական եւ շշալցման գծեր, կատարելագործվել են արտադրական գործընթացները՝ միջազգային չափանիշներին համապատասխան։

Արդյունքում By Nalbandyan ապրանքանիշի արտադրանքի առաջին խմբաքանակն արդեն արտահանվել է ԱՄՆ, իսկ արտադրության ընդլայնումը հնարավորություն կտա մեծացնել արտահանման ծավալներն ու մուտք գործել նոր շուկաներ, այդ թվում՝ եվրոպական երկրներ»,- տեղեկացրել է «Պրոյեկտ Ինտեր-Ինվեստ» ընկերությունը: Նարեկ Նալբանդյանը գրոհում է նաեւ ձվի շուկան։ «Գետամեջ» թռչնաֆաբրիկան նրա նախաձեռնությամբ վերագործարկվել եւ արդիականացվել է՝ դառնալով ժամանակակից թռչնաբուծական համալիր։ «Լուսակերտ» թռչնաֆաբրիկայում առաջիկայում կմեկնարկի լայնածավալ ծրագիր, որի շրջանակներում նախատեսվում է փուլային տեխնիկական վերազինում, արտադրական հզորությունների ընդլայնում եւ նոր աշխատատեղերի ստեղծում։ Նալբանդյանի «Գոլդեն Փելիս» (այժմ` Eighty Eight Hotel and Spa) Ծաղկաձորի հյուրանոցային համալիրը դարձել է ամենաշատ զբոսաշրջիկ ընդունող հյուրանոցը, իսկ օղիների արտադրությունն էլ այս սահմանափակումների ֆոնին դարձել է ամենաշատ պահանջարկ ունեցողը։ Այստեղ են ասել՝ ինչ չի կարելի Գագիկ Ծառուկյանին, կարելի է Նարեկ Նալբանդյանին: