Իսրայելի խորհրդարանը որոշել է ինքնալուծարվել հոկտեմբերի 27-ին նախատեսված արտահերթ խորհրդարանական ընտրություններից առաջ, հաղորդում է The Times of Israel-ը։

Խորհրդարանի լուծարման մասին օրենքը պաշտպանել են իշխող կոալիցիայի 62 անդամներ։ Ընդդիմության անդամները ձեռնպահ են մնացել քվեարկությունից։

Գործող խորհրդարանի լուծարումից հետո ընտրությունների արդյունքների հիման վրա կգումարվի նոր Քնեսեթ։ Իսրայելցիները կընտրեն 120 անդամ։ Խորհրդարանական մեծամասնություն և նոր կառավարություն ձևավորելու համար քաղաքական կուսակցություններից մեկը պետք է ապահովի առնվազն 61 տեղ։

Իսրայելի վարչապետ Բենիամին Նեթանյահուն, որը գլխավորում է «Լիկուդ» կուսակցությունը, մտադիր է կրկին մասնակցել ընտրություններին և պահպանել վարչապետի պաշտոնը։ Նեթանյահուն այս պաշտոնը զբաղեցրել է 2009-ից մինչև 2021 թվականը՝ վերադառնալով իշխանության 2022 թվականին։

Իսրայելի պաշտպանության բանակի նախկին գլխավոր շտաբի պետ Գադի Այզենկոտը, որը ներկայացնում է ընդդիմադիր «Յաշար» դաշինքը, համարվում է գործող վարչապետի գլխավոր մրցակիցը։ Վերջին հարցումների համաձայն՝ Այզենկոտը փոքր-ինչ առավելություն ունի Նեթանյահուի նկատմամբ ընտրողների շրջանում աջակցության առումով։

Հայոց ցեղասպանության հարցը, որի մասին բանաձևն ընդունել էր միաձայն երկրի կառավարությունը և որը ներառված էր Քնեսեթի օրակարգում՝ այդպես էլ առկախված մնաց։