Վիգեն Ավետիսի խոսքերը սուտ մատնություն են կամ զրպարտություն
Mon, 20 Jul 2026 18:32:41 +0400
«Լսել եմ պատմություն, որ մի քանդակագործի գցել էին առյուծի վանդակը, որը վախից մահացավ»,- խոսելով ԲՀԿ առաջնորդ Գագիկ Ծառուկյանի շուրջ ստեղծված իրավիճակի մասին՝ Նիկոլ Փաշինյանի ընտանիքին պատկանող «ՀԺ»-ի տաղավարում ասել է իտալահայ քանդակագործ Վիգեն Ավետիսը:
Հարցին՝ պատճառը ո՞րն էր, նշել է. «Չեմ հիշում, բայց գիտեմ, որ տենց պատմություն է եղել: Այսինքն՝ Ծառուկյանն առյուծներին օգտագործել է նաև մարդկանց վախեցնելու նպատակով»:
«Հրապարակ»֊ը տեղեկացավ, որ Ծառուկյանի փաստաբանները պատրաստվում են դատի տալ Վ. Ավետիսին։ ԲՀԿ առաջնորդի փաստաբան Երեմ Սարգսյանը հաստատեց տեղեկությունը. «Մենք հիմա փաստաբանական թիմի հետ քննարկում ենք 2 տարբերակ` հասկանալու համար հանցագործության մասին հաղորդում տանք` սուտ մատնության համար թե զրպարտության հիմքով ներկայացնենք, այսօր վերջնական կորոշենք, գուցեեւ երկուսն էլ ներկայացնենք, ամեն դեպքում այդ գործողությունները նախատեսում ենք, որովհետև ակնհայտ սուտ տեղեկություններ են հրապարակվել, կարծում ենք` դա պետք է չմնա անպատասխան։ Մենք, ըստ էության, պետական մարմինների կողմից իրականացվող հանցագործությունների հետևից գնում ենք` հաղորդումներ ներկայացնելով, որոնք որ մոտ օրերս ներկայացված կլինեն»։
Երեմ Սարգսյանն անդրադառնալով նաեւ մեր հարցին, թե Ծառուկյանին նրա տնից բերման ենթարկելու իրավապահների գործողությունների հետ կապված ինչ֊որ բան անելո՞ւ են, պատասխանեց. «Հաղորդումներ են ներկայացվելու հանցագործության մասին, ինչպես տանելու ձեւի, բռնություն կիրառելու հետ կապված, այնպես էլ տեսանյութի հրապարակման հետ կապված»։