«Հրապարակ». ԱԺ-ում կան նաեւ մահմեդականներ, կաթողիկոսը գար՝ ի՞նչ աներ
Thu, 06 Aug 2026 09:45:33 +0400
«Հրապարակի» զրուցակիցն ԱԺ նախկին ՔՊ-ական պատգամավոր Մարինա Ղազարյանն է:
– Տիկին Ղազարյան, 9-րդ գումարման խորհրդարանում Դուք չկաք, ինչո՞վ եք այժմ զբաղվելու:
– Հիմա հանգստանում եմ, ժամանակը ցույց կտա, օգոստոսի վերջին երեւի կկողմնորոշվեմ, թե ինչով զբաղվեմ: 40 տարի մանկավարժական գործունեությամբ եմ զբաղվել եւ կարծում եմ՝ այդ ոլորտում արդեն իսկ տվել եմ իմ պարտքը: Կմտածեմ, թե ինչով եմ զբաղվելու:
– Իսկ քաղաքականությամբ էլ չե՞ք զբաղվելու:
– Կարծում եմ, որ զբաղվելու եմ, իհարկե, կզբաղվեմ:
– Ինչպե՞ս եք քաղաքական գործունեություն ծավալելու, որտե՞ղ:
– Տարբեր մակարդակներում՝ թե՛ կուսակցական գործունեություն կծավալեմ, ինչպես նաեւ՝ որպես քաղաքացի….
– Կցանկանայի՞ք նորից պատգամավոր լինել:
– Գիտեք, դա մի էտապ էր, անցել է, եւ կարծում եմ, որ արդեն հերթն ավելի երիտասարդներինն է: Բայց եթե նորից լինի հնարավորություն, խնդիր չկա, նորից կզբաղվեմ:
– Բայց դե՝ տեսանք այդ երիտասարդներին, նրանք էլ չափազանց անփորձ են դեռ:
– Մեր ֆրակցիան Դուք գիտեք, այնտեղ կան թե՛ փորձառուներ, թե՛ անփորձներ, անփորձները՝ ոչինչ, կսովորեն: Այնպես չէ, որ բոլոր երիտասարդներն անփորձ են, չէ, կան երիտասարդներ, ովքեր ավագանու անդամներ են եղել, ակտիվ են եղել եւ լավ էլ փորձ ունեն: Ես, իհարկե, մեր ֆրակցիայի մասին եմ խոսում:
– Հետեւո՞ւմ եք ԱԺ նիստերին: Ի՞նչ կարծիք ունեք դրանց մասին:
– Հետեւում եմ, բայց թույլ տվեք մի քիչ էլ հետեւեմ, նոր կարծիքս ասեմ: Ընդդիմությունից ես այնքան էլ գոհ չեմ, բայց դե….
– Իշխանականները հորդորեցին ընդդիմադիրներին՝ համերաշխ լինել եւ աշխատել բարեկրթության սահմաններում:
– Դե, սպասենք տեսնենք, թե ինչպես կաշխատեն: Օրինակ, նախորդ գումարման ԱԺ-ում ընդդիմությունը լավ չի աշխատել, գիտեք, թե ինչքան բացակայություններ են ունեցել, անհաշվելի:
– Իսկ այն փաստը, որ կաթողիկոսը նորանկախ պատմության ընթացքում առաջին անգամ չօրհնեց ԱԺ անդրանիկ նիստը․․․ ի՞նչ կարծիք ունեք այս մասին:
– Գիտեք, եկեք կաթողիկոս կոչումը չկիրառենք, ի՜նչ կաթողիկոս…. նրանից ի՞նչ կաթողիկոս: Պետք չէր, որ այդ մարդը գար ԱԺ: ԱԺ-ում կան նաեւ այլ հավատալիքներ ունեցող մարդիկ, գար՝ ի՞նչ աներ:
– Դե, անկախությունից ի վեր միշտ եկել է:
– Սխալ է եղել, կան նաեւ մահմեդականներ այնտեղ:
– Բայց միշտ էլ եղել են ազգային կամ կրոնական փոքրամասնություններ, եթե նրանց նկատի ունեք, սակայն դա չի խանգարել, որպեսզի կաթողիկոսը տա իր օրհնությունը:
– Ինչո՞ւ պետք է գար, ի՞նչ պետք է ասեր նա: Ես կարող եմ ասել, որ մեր թիմը հրաշալի կազմով է հանդես եկել, եւ, այ, կտեսնեք, թե ինչքան լավ են աշխատելու: «Հայաստան» դաշինքը, տեսեք, այս անգամ փոքր կազմով է, դա ցույց է տալիս, որ հաջորդ անգամ նրանք չեն լինի:
– ՔՊ-ի կազմն էլ է նախորդի համեմատ փոքր:
– Ժամանակը ցույց կտա, դեռ վաղ է խոսելը: