Էդգար Ղազարյանի հայտարարությունը արվել է մինչև «Ուժեղ Հայաստան» դաշինքին միանալը
Thu, 06 Aug 2026 11:57:10 +0400
«Ուժեղ Հայաստան» խմբակցության քարտուղար Տիգրան Աբրահամյանը հայտարարել է, որ Էդգար Ղազարյանի՝ սակրավորների վերաբերյալ աղմկահարույց հայտարարությունն արվել է մինչև նրա՝ դաշինքի կազմում ընդգրկվելը։
ԱԺ ամբիոնից անդրադառնալով հարցին, թե արդյոք «Ուժեղ Հայաստան»-ը կիսում կամ պատասխանատվություն է կրում Ղազարյանի արտահայտությունների համար, Աբրահամյանը նշել է, որ մարդու կյանքը ցանկացած պարագայում բարձրագույն արժեք է, և նման ձևակերպումները չեն կարող ընդունելի լինել։
Նրա խոսքով՝ ցանկացած անձի կյանք պետք է գնահատվի և պաշտպանվի, իսկ այնպիսի արտահայտությունները, ինչպիսիք են՝ «ինչու չես զոհվել պատերազմում», անընդունելի են։
«Ինձ համար՝ որպես Հայաստանի Հանրապետության քաղաքացի, և վստահ եմ՝ մեր խմբակցության, կուսակցության ու դաշինքի անդամների համար, մարդու կյանքը բացարձակ արժեք է»,- նշել է Աբրահամյանը։
Անդրադառնալով հենց Էդգար Ղազարյանի դիրքորոշմանը՝ նա նշել է, որ Ղազարյանն արդեն հայտարարել է՝ իր խոսքերը համատեքստից դուրս են ներկայացվել, և ինքը պատրաստվում է լրացուցիչ անդրադառնալ այդ թեմային։