Փաշինյանը կարողացել է Պուտինին զանգել չորրորդ կամ հինգերորդ փորձից. Новое дело
Thu, 06 Aug 2026 21:45:36 +0400
Վարչապետ Նիկոլ Փաշինյանը երկօրյա աշխատանքային այցով մեկնել է Ղրղզստանի Հանրապետություն: Այդ մասին տեղեկացանք ՀՀ կառավարության հաղորդագրությունից եւ վարչապետի նորանշանակ մամուլի քարտուղար Մելանյա Հարությունյանի հայտարարությունից: Փաշինյանը Չոլպոն-Ատայում կմասնակցի Եվրասիական միջկառավարական խորհրդի հերթական նիստին:
Հիշեցնենք, որ ընդամենը օրեր առաջ էր Փաշինյանը «սպառնում», որ ԵԱՏՄ-ի վերջի սկիզբը կլինի, եթե Ռուսաստանը չվերացնի Հայաստանի դեմ նախաձեռնված տնտեսական արգելքները: Փաստորեն ԵԱՏՄ-ի վերացումը «կանխատեսող» Փաշինյանն, այնուամենայնիվ, որոշել է մասնակցել ԵԱՏՄ այս նիստին: Բնականաբար, ԵԱՏՄ-ին, Ռուսաստանին ուղղված Փաշինյանի հայտարարությունները չեն վրիպել ռուսական կողմի ուշադրությունից:
Ռուսական Новое дело-ի թղթակից Վադիմ Անդրյուխինը, անդրադառնալով ԵԱՏՄ նիստին մասնակցող Փաշինյանին, այսօր գրել է, որ վերջինս կատարյալ հիստերիայի մեջ է ու դրա հիմնական պատճառն այն է, որ ռուսական կողմի տնտեսական սահմանափակումների պատճառով Հայաստանում որոշ արտադրողներ սկսել են ճանապարհներ փակել, իսկ Պուտինին արված զանգն էլ անարդյունք է եղեղ, ուրեմն` ի՞նչ էր մնում Փաշինյանին, եթե ոչ հիստերիայի մեջ ընկնելը, գրում է հեղինակը եւ հիշեցնում է, որ Փաշինյանը սպառնում էր դուրս գալ ԵԱՏՄ-ից, ու դեռ «Ռուսական երկաթուղիներից» էլ որոշել էր երկու միլիարդ դոլար պահանջել, որոնք, իբրև թե Հայաստանը չի ստացել և այլն: Իսկ այն, ինչ տրվել էր «ռուսական երակթուղիների» կոնցեսիոն կառավարմանը, հոդվածագիրը շեշտում է, որ Հայաստանն ի վիճակի չէր պահել, շահագործել ու առավել ևս ներդրումներ կատարել դրա զարգացման համար: Նրան թվում է, որ առավել քան խոսուն է այն փաստը, որ մինչև վերջերս հայկական կողմն այս մասով ոչ մի հուզող հարց կամ խնդիր չէր տեսնում:
Անդրյուխինը գրում է. «Ակնհայտ է, որ այստեղ խնդիրը տնտեսական հարցերը չեն, այլ Ռուսաստանի և Հայաստանի միջև հարաբերությունների փաստացի խզումը, որը տեղի ունեցավ Նիկոլ Փաշինյանի իշխանության գալուց հետո, ով հավատարիմ էր Արևմուտքի հետ մերձեցմանը: Այն բանից հետո, երբ Փաշինյանը սկսեց բացահայտ սիրախաղ անել արևմտամետների հետ, իր տարածքում անցկացնել տարբեր հակառուսական ֆորումներ՝ եվրոպացի առաջնորդների մասնակցությամբ, և անտեսել Եվրասիական տնտեսական միության (ԵԱՏՄ) և Հավաքական անվտանգության պայմանագրի կազմակերպության (ՀԱՊԿ) պաշտպանական դաշինքի շրջանակներում ինտեգրացիոն գործընթացները, Ռուսաստանը պահանջեց, որ Փաշինյանը հստակ ձևակերպի իր դիրքորոշումը: Կամ նա կշարունակի գործել արևմտյան ռազմավարության շրջանակներում և լիովին կխզի կապերը Ռուսաստանի հետ, կամ` կկրճատի իր շփումները Եվրոպայի և Միացյալ Նահանգների հետ: Որպեսզի Փաշինյանը լավ մտածի այդ մասին, սահմանափակումներ սահմանվեցին Հայաստանից ապրանքների մատակարարման վրա»:
Հեղինակն անդրադառնում է նաև Պուտինի հետ Փաշինյանի վերջին հեռախոսային խոսակցությանը եւ նշում է, որ այդ զանգը մտահոգված Փաշինյանն արել է այն բանից հետո, երբ հայ արտադրողները ճանապարհ փակեցին և Անդրյուխինին հասած տեղեկատվությամբ` Փաշինյանը կարողացել է Պուտինին միանալ չորրորդ կամ հինգերորդ փորձից հետո միայն: «Ինչպես պնդում են լավատեղյակ մարդիկ, Պուտինն ամբողջությամբ անտեսել է Փաշինյանի խնդրանքներն ու ողբը, պահանջելով հանրաքվե անցկացնել ու հստակեցնել Հայաստանի քաղաքական կուրսը: Հենց այդ անհաջող փորձից հետո էլ Փաշինյանը հիստերիայի մեջ է ընկել՝ պահանջելով երկու միլիարդ «Ռուսական երկաթուղիներից» և խոսելով ԵԱՏՄ-ի կործանման մասին»,- շեշտում է Անդրյուխինը:
Հիշեցնենք, որ այսօր, վաղը կայանալիք նիստի շրջանակներում քննարկվելու են ԵԱՏՄ շրջանակներում ինտեգրման, առևտրային խոչընդոտների վերացման և տնտեսական համագործակցության ընթացիկ հարցեր։