Ո՞րն է այն գինը, որը դուք պատրաստվում եք վճարել
Fri, 07 Aug 2026 10:51:47 +0400
Ընդդիմադիր պատգամավոր Իշխան Սաղաթելյանը անդրադարձել է Հայաստանի՝ Ադրբեջանի և Թուրքիայի հետ հարաբերությունների կարգավորման գործընթացին՝ քննադատելով իշխանությունների վարած քաղաքականությունը։
Նրա խոսքով՝ գլխավոր հարցն այն է, թե ինչ ճանապարհով է իրականացվում հարաբերությունների կարգավորումը և ինչ գին է պատրաստ վճարել իշխանությունը այդ գործընթացի համար։
Սաղաթելյանը հայտարարել է, որ իշխանությունների մոտեցումը, իր գնահատմամբ, ենթադրում է մի շարք զիջումներ՝ այդ թվում Անկախության հռչակագրի դրույթներից հրաժարում, Հայոց ցեղասպանության թեմայի մերժում և սահմանազատման ու սահմանագծման գործընթացների շրջանակում նոր զիջումներ Ադրբեջանին։
Ընդդիմադիր պատգամավորը այս հայտարարություններն ուղղել է իշխող ուժին՝ ընդգծելով, որ հարաբերությունների կարգավորումը չպետք է իրականացվի ազգային շահերի հաշվին։
«Որտե՞ղ է թաղված շան գլուխը, որտեղ է հիմնական խնդիրը, արդյոք այն ճանապարհը, որով գնում եք դուք, հարաբերությունները կարգավորելու ճանապարհն է ու ո՞րն է այն գինը, որը դուք պատրաստվում եք վճարել՝ իբր այդ հարաբերությունները կարգավորելու համար»,- ասել է նա: