ԶՈՒ բարոյահոգեբանական վարչությունում փոփոխություններ իրականացվե՞լ են
Fri, 14 Aug 2026 17:45:15 +0400
Հինգշաբթի լրագրողների հետ հարցուպատասխանի ժամանակ վարչապետ Նիկոլ Փաշինյանն անդրադարձավ զինծառայող Գրիգոր Զաքարյանի մահվան դեպքին և ՀՀ զինված ուժերում հաճախակի դարձած մահվան դեպքերի համար պատասխանատվության հարցին՝ հայտարարելով, որ ՀՀ ԶՈՒ-ում առաջիկայում կադրային փոփոխություններ կլինեն։
Փաշինյանի խոսքով՝ նույն օրն առավոտյան իրադրությունը քննարկել են պաշտպանության նախարար Սուրեն Պապիկյանի հետ, և արդեն որոշում է կայացվել պատասխանատուների նկատմամբ կադրային լուծումների գնալու մասին։ «Ես որոշում արդեն կայացրել եմ․ ռազմական ոստիկանությունում փոփոխություն կլինի, բարոյահոգեբանական ապահովման վարչությունում փոփոխություն կունենանք։ Մանրամասն կվերլուծենք, թե ինչու այդ ուղղությամբ գործադրած ջանքերը մեզ համար ցանկալի արդյունքներ չեն տալիս։ Հետևություններ կարվեն, և, այո՛, պետք է լինի անհատական պատասխանատվություն»,– ասել էր վարչապետը։
Երեկ տեղեկացանք, որ ՌՈ պետն արդեն դիմում է գրել ազատման եւ անգամ թեկնածուի անունն է շրջանառվում` նախկին ոստիկանապետ Արամ Հովհաննիսյան: Ի դեպ, այս անձնավորույթան դղյակի մասին էր մարզ կատարած այցի ժամանակ ուղեկիցներից մեկը պատմում Փաշինյանին եւ նա էլ` արմունկով հարվածում էր, թե` լռիր: Գուցե այն ժամանակ արդեն որոշում կար նախկին ոստիկանապետին նոր պաշտոն տալու մասին:
Փորձեցինք Պաշտպանության նախարարությունից ճշտել՝ արդյո՞ք ՀՀ ԶՈՒ բարոյահոգեբանական ապահովման վարչությունում պաշտոնանկություններ տեղի ունեցել են, թե ոչ։ Պաշտպանության նախարարի խոսնակը մեր զանգերին չպատասխանեց։ Փորձեցինք կապ հաստատել նաև բարոյահոգեբանական ապահովման վարչության հետ: Խոսափողը վերցրած անձից ճշտեցինք` հնարավո՞ր է խոսել վարչության պետ Սերյոժա Ստեփանյանի հետ։ Զանգին պատասխանած անձը հայտնեց, որ անհրաժեշտ է զանգահարել ընդմիջումից հետո։ Հարցին՝ Սերյոժա Ստեփանյանն այսօր աշխատանքի եկե՞լ է, պատասխանեցին՝ այո։
Սակայն ընդմիջումից հետո վարչություն կատարած մեր զանգերին այլևս չպատասխանեցին։
Հիշեցնենք՝ օգոստոսի 13-ին ՀՀ պաշտպանության նախարարությունը հայտնել էր, որ ՊՆ N զորամասի զինծառայող Գրիգոր Էդգարի Զաքարյանի դին հայտնաբերվել է հրազենային վնասվածքով։ Զաքարյանի մահը վերջին մեկ ամսվա ընթացքում զինծառայողի մահվան արդեն երկրորդ դեպքն է` խաղաղ պայմաններում։ Հուլիսին հայտնի էր դարձել ժամկետային զինծառայող Նարեկ Թորոսյանի մահվան մասին։