Մոտ 13 հազար տարեկան արձան են գտել
Sat, 15 Aug 2026 22:00:36 +0400
Ռուսաստանում, Օմսկի մարզում հնագետները պեղումների ժամանակ 12-13 հազար տարեկան արձան են գտել։ Այն պատրաստված է եղել բիզոնի ոսկորից։ Այս մասին հայտնում է Ռուսական Աշխարհագրական ընկերության Օսմկի բաժանմունքը։ Գտնված ոսկորե արձանը ունի մարդու կերպարանք։ Արտեֆակտը գտնվել է Սարգատսկի շրջանի Չերնոզեմիե 2 տեղամասում, որը թվագրվում է պալեոլիթի վերջի շրջանով։
Դեռեւս հստակ չէ, թե արձանն ինչ նշանակություն եւ կիրառություն է ունեցել։ Հնարավոր է, որ այն պարզապես մանկական խաղալիք է եղել, կամ կապված է եղել հին պաշտամունքների հետ։ Գտածոն կհամալրի Օմսկի պետական համալսարանի հնագիտության եւ ազգագրության թանգարանի ցուցանմուշների հավաքածուն։ Հնագետները հայտնաբերել են նաև բիզոնի թիակոսկրից պատրաստված առարկայի մի հատված, որը, ենթադրաբար, եղել է շյուղ կամ կաշվի մշակման համար նախատեսված հղկիչ գործիք, ինչպես նաև Արևմտյան Սիբիրի համար չափազանց հազվագյուտ գտածո՝ ատամնավոր եզրերով և զարդանախշով ոսկրե ապարանջանի մի հատված։