Մենք տեղեկացանք, որ Պաշտպանության նախարար Սուրեն Պապիկյանը ՊՆ-ում կադրային ջարդ է սկսել, մասնավորապես մի քանի կարևոր ենթակառուցվածքների ղեկավարների այս օրերին տեղեկացրել են, որ իրենց պայմանագիրը չի երկարացվելու, և աշխատանքը նրանք չեն շարունակելու: Այս ամենին զուգահեռ մեզ նաև պատմեցին, որ նախարարությունում նոր հաստիքներ են ստեղծվում, և նոր կադրեր են աշխատանքի անցնելու:

Հիշեցնենք, որ բանակում` խաղաղ պայմաններում զոհերի քանակի աճին զուգահեռ համակարգում քավության նոխազներ են փնտրում: Մեկը Ռազմական ոստիկանությունն է, մյուսը` բանակի բարոյահոգեբանական ապահովման վարչությունը, որտեղ կադրային փոփոխություններ են իրականացվելու, ինչպես օրերս ճեպազրույցի ժամանակ հայտարարեց Նիկոլ Փաշինյանը` պատասխանելով հարցին, թե չի՞ պատրաստվում պատժել պաշտպանության նախարարին` այդ վիճակի համար: Նա Պապիկյանի մասը շրջանցեց, ասելով, որ կադրային փոփոխություններ կլինեն եւ նույն օրը Ռազմական ոստիկանության պետը ազատման դիմում գրեց:

Այսինքն, բոլորը պատասխանատու են, բացի նախարար Սուրեն Պապիկյանից, որի ժամանակ բանակը դադարել է կատարել իր ֆունկցիան, որի ժամանակ թմրանյութերն ու մոլեխաղերն են ծաղկում, իսկ հմուտ զինվորականները հեռացել են կամ հեռացվել ՊՆ-ից: Մենք նաև գրել էինք, որ Փաշինյանը հրահանգել է բանակից հեռացնել բոլոր այն զինվորականներին, ովքեր չեն ատեստավորվել, և առաջին պլան բերել նրանց, ովքեր ատեստավորված են: