ՀՀ քաղաքացիներին արգելվա՞ծ է սովորել Ստամբուլում․ Քոփթաշի արձագանքը
Wed, 19 Aug 2026 10:00:57 +0400
Թուրքիայում լույս տեսնող հայկական «Ակօս» շաբաթերթի նախկին գլխավոր խմբագիր Ռոբեր Քոփթաշն անդրադարձել է ՀՀ քաղաքացիների՝ Ստամբուլի հայկական դպրոցներում սովորելու արգելքի մասին լուրերին։
Ինչպես հաղորդում է Ermenihaber-ը, նա մասնավորապես նշել է.
«Այստեղ շատ երեխաների և ընտանիքների համար մեծ ցավ կա։ Հայաստանից արտագաղթած ընտանիքների երեխաների՝ Ստամբուլի հայկական դպրոցներում որպես «հյուրի կարգավիճակով աշակերտ» սովորելու հնարավորությունն այժմ կառավարության կողմից արգելվում է։ Մինչդեռ ավելի քան 10 տարի առաջ հենց նույն իշխանությունն էր ստեղծել այս «ժամանակավոր» լուծումը»։
Ըստ Քոփթաշի՝ հարցը կարելի էր հեշտությամբ լուծել ընդամենը մեկ վարչական կարգավորմամբ, մինչդեռ տարիներով ձգձգելուց հետո այժմ հարցը «լուծվում» է ամենակոշտ միջամտությամբ, որը նոր վերքեր է բացելու։
«Թուրքիայի հայ համայնքի կառույցները պետք է այս հարցում ավելի պահանջատեր լինեն։ Մամուլն ու քաղաքացիական հասարակության կազմակերպություններն էլ պետք է ջանք գործադրեն՝ հարցի էությունը հասկանալու և իրենց ձայնը բարձրացնելու համար»:
Քոփթաշը նշել է, որ Թուրքիայի և հայերի, Թուրքիայի և Հայաստանի իրավական հարաբերությունները չպետք է թողնել զուտ սառը իրավական մոտեցումների շրջանակում, հատկապես այն ժամանակ, երբ որոշ խնդիրներ կարծես արդեն մտել են լուծման ուղի։ Այստեղ կան հարյուրավոր տարիների համատեղ կյանքի արդյունքում ձևավորված շատ խորն ու բարդ կապեր։