Ութ երկիր դատապարտել է Իսրայելի ծրագիրը
Sat, 22 Aug 2026 15:00:15 +0400
Ութ երկրի ԱԳ ղեկավարները դատապարտել են Իսրայելի` պաղեստինյան տարածքներում բնակավայրերի ընդլայնման վերաբերյալ քաղաքականությունը և մերժել են E1 բնակավայրի կառուցման ծրագիրը։ Այս մասին հայտնում է ՌԻԱ Նովոստի-ն։
Փաստաթուղթը ստորագրել են Թուրքիայի, Եգիպտոսի, Ինդոնեզիայի, Հորդանանի, Պակիստանի, Կատարի, Սաուդյան Արաբիայի և ԱՄԷ-ի արտաքին գործերի նախարարները։
«Մենք կտրականապես մերժում ենք E1 բնակավայրի ծրագիրը և դրա հետ կապված բնակեցման գործողությունները օկուպացված Արևելյան Երուսաղեմից արևելք»,- ասված է ԱԳ նախարարների համատեղ հայտարարության մեջ։
Նախարարները դատապարտել են նաև Իսրայելի իշխանությունների աջակցությամբ իսրայելցի բնակիչների կողմից պաղեստինցիների և նրանց գույքի նկատմամբ իրականացվող բռնություններն ու խախտումները։
Նրանց գնահատմամբ՝ նման գործողությունները խախտում են միջազգային իրավունքը և ՄԱԿ-ի համապատասխան բանաձևերը, ինչպես նաև լուրջ սպառնալիք են ստեղծում տարածաշրջանային ու միջազգային խաղաղության և անվտանգության համար։
Արտգործնախարարները զգուշացրել են, որ E1 ծրագիրը վտանգավոր էսկալացիա է, քանի որ նպաստում է բնակավայրերի ընդլայնմանը և պաղեստինյան տարածքների բռնակցմանը։
Նրանք վերստին ընդգծել են, որ միջազգային իրավունքի և ՄԱԿ-ի բանաձևերի համաձայն` երկու պետությունների ստեղծման մասին որոշումը շարունակում է մնալ արդար, համապարփակ և երկարատև խաղաղության հասնելու միակ կենսունակ ուղին։