Նա Արցախից է, Ձեզ հետ էլ չի պայմանավորվել․ դրա համար եք ատում
Tue, 25 Aug 2026 13:51:34 +0400
ԱԺ-ում ելույթի ժամանակ «Հայաստան» խմբակցության պատգամավոր Աննա Գրիգորյանը կոշտ քննադատության ենթարկեց Նիկոլ Փաշինյանի վարած քաղաքականությունն ու նրա վերաբերմունքը ինչպես Ադրբեջանի ղեկավարության, այնպես էլ Հայաստանի քաղաքացիների նկատմամբ։
Պատգամավորը հայտարարեց, որ, իր գնահատմամբ, Փաշինյանը Ադրբեջանի նախագահ Իլհամ Ալիևի հետ հարաբերություններում թույլ դիրք է ցուցաբերում, մինչդեռ Հայաստանի քաղաքացիների նկատմամբ դրսևորում է թշնամական և ատելության վրա հիմնված վերաբերմունք։
Գրիգորյանի խոսքով՝ հայ հասարակության մեջ խորն է արդարության պահանջը, որը կապված է Եռաբլուրի, Արցախի կորստի և հայկական պետականության առջև ծառացած խնդիրների հետ։ Նա ընդգծեց, որ այդ պահանջը, իր համոզմամբ, ժամանակի ընթացքում անպայման ստանալու է իր լուծումը։
Պատգամավորը նաև մեղադրեց Նիկոլ Փաշինյանին Արցախին ու արցախյան հիմնախնդրին հակադրվելու մեջ։ Անդրադառնալով նախկին նախագահ Ռոբերտ Քոչարյանին՝ Գրիգորյանը հայտարարեց, որ Փաշինյանի վերաբերմունքը նրա նկատմամբ պայմանավորված է նաև Քոչարյանի արցախյան ծագմամբ և քաղաքական դիրքորոշմամբ։
Ելույթի ավարտին Աննա Գրիգորյանը Նիկոլ Փաշինյանին անվանեց պարտված ղեկավար և շեշտեց, որ ընդդիմադիր ուժերը շարունակելու են պայքարը արդարության վերականգնման համար։
«Դուք Ռոբերտ Քոչարյանին ատում եք, որովհետև Արցախից է, ատում եք, որովհետև ձեր հետ չի պայմանավորվել»,- ասել է նա։